Oliy Majlis Qonunchilik palatasi deputati Rasul Kusherbayev Telegram’dagi kanalida “Sudya prokuror bilan maslahatlashdi” sarlavhali post qoldirdi. Sudyalar oliy kengashi holatga munosabat bildirdi.
Deputatning aytishicha, zangiotalik S.Tulyaganovaning bildirilishicha, 29-iyun kuni JIB Zangiota tuman sudi sudyasi D.T. sud majlisini soat 17:00 ga belgilagan bo‘lishiga qaramay, soat 19:00 ga qadar boshlamagan. Sababi prokuratura xodimi F.O. majlisga yetib kelmagan. Prokuratura xodimi kelgach, sudya alohida xonada oldindan ushbu xodim bilan maslahat qilib, soat 19:30 larda zalga kirib majlisni boshlagan. Uning prokuratura xodimi bilan alohida maslahat qilganini kotib o‘z so‘zi bilan tasdiqlab qo‘ygan.
Keyin sudya hech narsa bo‘lmagandek, oldindan ishni pishirib bo‘lgan “maslahatchisi” prokuraturaga taraf sifatida so‘z bergan.
“U yog‘i nima bo‘lgani qiziqmas. Muhimi bu haqiqat bo‘lsa, sudya odil sudlovni amalga oshirishdagi muqaddas qoida: taraflar tengligi, sudning barcha, shu jumladan, prokuraturadan holi, mustaqil ekani, ular bilan til biriktirmaganini amalda ko‘rsatib bera olmagan.
Afsuski, murojaatda aytilganlar bo‘lishi mumkin: ayrim sudya va prokuratura xodimlarining sud binosida bir eshikdan xonalarga kirib chiqishi, alohida suhbatlar qilishi, oshna-og‘ayni bo‘lib ketgani ko‘z yumib bo‘lmas fakt”, — deydi Rasul Kusherbayev.
Sudyalar oliy kengashi holat yuzasidan ayni paytda xizmat tekshiruvi o‘tkazilayotganini bildirdi.
Xizmat tekshiruvi Toshkent viloyati sudlari sudyalar malaka hay’ati tomonidan olib borilmoqda. Natijasi yuzasidan qo‘shimcha axborot beriladi.
Izoh (0)