Бугунги кунда қулай шартларда уйдан ёки ишхонадан чиқмаган ҳолда омонат очиш мумкин. Бунинг учун банк картаси ҳамда мобил илова бўлса кифоя.
Онлайн-омонат ўзи нима ва ундан қандай фойдаланса бўлади?. Буларнинг барчаси «Дарё» шарҳида.
Банклар онлайн омонат хизматларидан фойдаланиш имкониятини тақдим этмоқда.
Бошқа банкка тегишли банк картасига омонат очса бўладими?
Банкнинг мобил иловаси орқали бошқа банк картасидан онлайн омонат очиш имконияти мавжудлиги тўғрисида бевосита мобил илова, банкнинг расмий веб сайти ёки банк ходимларидан билса бўлади.
Агар маълум бир банкда омонат очиш имконияти фақат мижозларга тақдим этилса, шунчаки банк картасини очиб, унга пул маблағларини киритиш мумкин.
Мижозларга қулайлик яратиш мақсадида банклар картани масофавий очиш хизматини йўлга қўйган.
Бунинг учун банкнинг веб сайти ёки мобил иловаси ёрдамида ариза тўлдириб, шахсингизни тасдиқловчи ҳужжат (паспорт/ идентификация ID-картаси/ янги намунадаги ҳайдовчилик гувоҳномаси/ ҳарбий билет) расми юкланади.
Онлайн омонатлар учун фоизлар қандай ҳисобланади ва тўланади?
Онлайн омонатлар учун фоизлар оддий омонатларга ҳисобланганидек бўлади ҳамда пул банк картасига ёки мобил иловадаги электрон ҳамёнга ўтказилади. Фоизларни ҳисоб-китоб қилиш учун депозит калкуляторидан фойдаланиш керак.
Банкдаги барча омонатларни онлайн равишда очиш мумкинми?
Бу борада банклар сиёсати жуда хилма-хилдир — офлайн режимда очиладиган омонатларни ҳар доим ҳам онлайн тарзда очиш имконияти бўлмайди.
Онлайн омонатларни қайтариш қанчалик кафолатланган?
Онлайн омонатларни очишда хотиржам бўлиш мумкин, чунки улар омонатнинг ҳар қандай тури сингари, миқдори ва валютасидан қатъий назар, Ўзбекистон қонунларга мувофиқ кафолатланади.
Омонат билан боғлиқ муаммолар юзага келганда нима қилиш керак?
Онлайн омонатлар ва мобил иловалардан фойдаланиш билан боғлиқ муаммолар юзага келганда, хизмат кўрсатувчи банкнинг расмий веб сайтида кўрсатилган рақамлар орқали боғланиш мумкин бўлади.
Мақолада Марказий банкнинг «Finlit.uz» сайтидаги маълумотлардан фойдаланилди.
Изоҳ (0)