Uydan turib bankka pul qo‘ysa ham bo‘ladi. Onlayn omonatlar haqida muhim ma’lumotlar

Bugungi kunda qulay shartlarda uydan yoki ishxonadan chiqmagan holda omonat ochish mumkin. Buning uchun bank kartasi hamda mobil ilova bo‘lsa kifoya. 

Onlayn-omonat o‘zi nima va undan qanday foydalansa bo‘ladi?. Bularning barchasi “Daryo” sharhida.

Banklar onlayn omonat xizmatlaridan foydalanish imkoniyatini taqdim etmoqda.

Boshqa bankka tegishli bank kartasiga omonat ochsa bo‘ladimi?

Bankning mobil ilovasi orqali boshqa bank kartasidan onlayn omonat ochish imkoniyati mavjudligi to‘g‘risida bevosita mobil ilova, bankning rasmiy veb sayti yoki bank xodimlaridan bilsa bo‘ladi. 

Agar ma’lum bir bankda omonat ochish imkoniyati faqat mijozlarga taqdim etilsa, shunchaki bank kartasini ochib, unga pul mablag‘larini kiritish mumkin. 

Mijozlarga qulaylik yaratish maqsadida banklar kartani masofaviy ochish xizmatini yo‘lga qo‘ygan. 

Buning uchun bankning veb sayti yoki mobil ilovasi yordamida ariza to‘ldirib, shaxsingizni tasdiqlovchi hujjat (pasport/ identifikatsiya ID-kartasi/ yangi namunadagi haydovchilik guvohnomasi/ harbiy bilet) rasmi yuklanadi.

Onlayn omonatlar uchun foizlar qanday hisoblanadi va to‘lanadi?

Onlayn omonatlar uchun foizlar oddiy omonatlarga hisoblanganidek bo‘ladi hamda pul bank kartasiga yoki mobil ilovadagi elektron hamyonga o‘tkaziladi. Foizlarni hisob-kitob qilish uchun depozit kalkulyatoridan foydalanish kerak.

Bankdagi barcha omonatlarni onlayn ravishda ochish mumkinmi?

Bu borada banklar siyosati juda xilma-xildir — oflayn rejimda ochiladigan omonatlarni har doim ham onlayn tarzda ochish imkoniyati bo‘lmaydi.

Onlayn omonatlarni qaytarish qanchalik kafolatlangan?

Onlayn omonatlarni ochishda xotirjam bo‘lish mumkin, chunki ular omonatning har qanday turi singari, miqdori va valyutasidan qat’iy nazar, O‘zbekiston qonunlarga muvofiq kafolatlanadi.

Omonat bilan bog‘liq muammolar yuzaga kelganda nima qilish kerak?

Onlayn omonatlar va mobil ilovalardan foydalanish bilan bog‘liq muammolar yuzaga kelganda, xizmat ko‘rsatuvchi bankning rasmiy veb saytida ko‘rsatilgan raqamlar orqali bog‘lanish mumkin bo‘ladi.

Maqolada Markaziy bankning “Finlit.uz” saytidagi ma’lumotlardan foydalanildi.