Ижтимоий тармоқларда кичик ёшли болани жисмоний оғритиб, тиббиёт талабларига мутлақо мос бўлмаган уқалаш муолажаси амалга оширилаётгани акс этган видеолавҳа тарқалди. «Дарё» нашри мазкур ҳолат юзасидан Республика ихтисослаштирилган травматология ва ортопедия илмий-амалий тиббиёт маркази мутахассисидан изоҳ олди.
Марказнинг Болалар ортопедияси бўлими раҳбари, тиббиёт фанлари доктори, профессор Аҳрорбек Жўраевнинг таъкидлашича, видеода акс этган массаж даволаш стандартларига мутлақо жавоб бермайди
«Биз болалар ортопедия соҳасида физиотерапия муолажалари, жисмоний муолажаларни кенг қўллаймиз. Лекин бундай тарзда массаж қилишга ҳеч қачон йўл қўйилмайди. Ҳар бир физиотерапия муолажаси, массаж қилиш, умумий массаж бўладими ёки қайсидир қисман, оёқ, қўл, умуртқа, бел массаж қилиш, даволаш структурасини ўтказиш ўзининг стандартлари асосида олиб борилади. Бу стандартларда қайси касалга, қай вақтда, қанча вақт давомида қанақа қилиб массаж қилиш ҳаммаси ёзилган. Ўша стандартлар асосида олиб борилади. Мен ўша видеода кўрган массаж даволаш стандартларига мутлақо жавоб бермайди.
Кичкина болалар биринчи даволаш муолажаларини олаётганда, мисол учун, қанақадир инъекция бўладими, массаж бўладими, парафин қўйиладими, электрофорез қилинадими 2-3 ёшли болалар, албатта, хавотирга тушади, таъсирланади. Шунинг учун уларга бундай муолажаларни қилишдан олдин ҳамшира ёки шу муолажани қилаётган ходим бола билан олдин контактга киришиб олиш керак. Бола массажга ўргангунча уни сал кўтаради, ўзига ўргатади, кейин енгилроқ массаж қилади. Кейин шу муолажаларни бемалол қилиш имкони туғилади. Биз кўраётган видеолавҳада болани овози борича бақиртиряпти. Бу шунақанги асоратларга олиб келиш мумкинки, буни кейин умуман тузатиб бўлмайди.
Масалан, бундай ҳолатда биринчидан суяклар зарарланиши, бўғимдан чиқиб кетиши, суяк синиб қолиши ёки бўғим юзаси сурилиб қолиши мумкин. Суяк зарарланмаса ҳам бўғимнинг атрофида пайлар бўлади, улар узилиб кетиши мумкин. Шунингдек, мускуллар зарарланиши мумкин. Бундай қўполлик билан даволашса пайларга, мускулларга қон қуйилади. Чунки у қаттиқ тортилади, қон қуйилади. Натижада боланинг иссиғи чиқади. у шишиб кетади, оғрийди, бўғимнинг ичида сув йиғилади, кейин бўлим яллиғланиши мумкин. Унда бу муолажадан оладиган фойдадан кўра зарари кўпайиб кетади. Шунинг учун бундай даволаш структураси қилинишига мутлақо рухсат берилмайди. Юқорида мен айтган массажлар қилинганидан кейин даволаш структураси қилинади. Бунда ҳам биринчи муолажалар аста-секинлик билан очиб-ёзиб, букиб-ёзиб амалга оширилади. Ундай қилинмаса ўша юқорида айтган асоратлар кузатилиши мумкин.
Бу видеода кўрсатилаётган массаж болалар ортопедияси касалларига қилинадиган муолажаларга мутлақо тўғри келмайди деб ҳисоблайман.
Ота-оналарга маслаҳатим, хусусий клиникаларга боришадиган бўлса, албатта, улар бу соҳадан билимга эгами, физиотерапия, массаж, даволаш физкултураси бўйича ўқиган сертификатларини сўрашса мақсадга мувофиқ бўларди.
Туман, вилоят шифохоналарида сертификати, мутахассислиги бўлмаган мутахассислар бўлмаса уларга бу иш билан шуғулланишга рухсат берилмайди».
Маълумот учун, тарқалган хабарларга Соғлиқни сақлаш вазирлиги муносабат билдирди. Унда қайд этилишича, Чилонзор туманидаги 38-оилавий поликлиникада тасвирга олингани айтилган уқалаш сеанси у ерда эмас, балки ушбу муассаса биносининг хусусий корхонага тегишли бўлган қисмидаги хоналардан бирида амалга оширилган.
«Массаж муолажасини бажарган шахс Б.З. билан суҳбатда у мазкур фаолият билан шуғулланиш учун тегишли рухсатнома ва сертификатга, қолаверса, физиотерапия йўналишида диплом ва малака тоифасига эга эмаслигини маълум қилган. Шу боис Соғлиқни сақлаш вазирлиги юқоридаги ҳолатга ҳуқуқий баҳо бериш учун ҳуқуқ-тартибот идораларига мурожаат қилган», – дейилади ССВ хабарида.
Вазирлик ахборотида айтилишича, айни пайтда ҳолат юзасидан текширув ишлари давом эттирилмоқда ва уларнинг натижалари бўйича қўшимча маълумот берилади.
Изоҳ (0)