Қутқарувчилар Тошкент вилоятидаги тоғларга чиқиб, тушолмай қолган фуқароларга амалий ёрдам кўрсатди. Бу ҳақда ФВВ матбуот хизмати хабар берди.
Қайд этилишича, 4 июль куни соат 13:15 ларда «Қамчиқ» Махсус қидирув, ёнғин-қутқарув бошқармасининг навбатчи диспетчерлик хизматига тоғда одам қолиб кетгани ҳақида маълумот келиб тушган.
Шунга кўра, қутқарувчилар айтилган манзилга зудлик билан етиб борган. Аниқланишича, Андижон вилоятидан келган 3 нафар фуқаро дам олиш мақсадида Қамчиқ довонининг Эртош қишлоғига бориб баланд тоққа чиққан ва улардан бири тоғдан тушолмай қолиб кетган.
Қутқарувчилар томонидан олиб борилган қидирув-қутқарув ишлари натижасида фуқаро хавфсиз жойга олиб тушилиб, амалий ёрдам кўрсатилган. Ҳодиса оқибатида ҳеч ким тан жароҳати олмаган.
Ундан бир кун аввал, 3 июль куни 9 киши дам олиш учун Тошкент вилоятининг Бўстонлиқ туманига борган ва тоғ қияликларида сайр қилиб юрган вақтида улардан бирининг оёғи қайрилиб, йиқилиб тушиши оқибатида чап оёғи қаттиқ лат еб, юролмай қолган.
Ҳолат юзасидан соат 13:30 ларда Тошкент вилояти ФВБнинг тезкор бошқарув марказига хабар келиб тушган.
Зудлик билан воқеа жойига етиб борган Чимён ёнғин-қутқарув отрядининг бир гуруҳ қурқарувчилари томонидан олиб борилган қидирув-қутқарув ишлари натижасида дам олувчиларнинг манзили аниқланиб, жабрларган 21 ёшли фуқаро махсус қутқарув анжомлари ёрдамида хавфсиз жойга олиб чиқилган. Айни вақтда фуқаронинг аҳволи яхши.
Мавзуга доир: Бўстонлиқдаги тоғларда адашиб қолган беш киши қутқарилди
Изоҳ (0)