Ijtimoiy tarmoqlarda kichik yoshli bolani jismoniy og‘ritib, tibbiyot talablariga mutlaqo mos bo‘lmagan uqalash muolajasi amalga oshirilayotgani aks etgan videolavha tarqaldi. “Daryo” nashri mazkur holat yuzasidan Respublika ixtisoslashtirilgan travmatologiya va ortopediya ilmiy-amaliy tibbiyot markazi mutaxassisidan izoh oldi.
Markazning Bolalar ortopediyasi bo‘limi rahbari, tibbiyot fanlari doktori, professor Ahrorbek Jo‘rayevning ta’kidlashicha, videoda aks etgan massaj davolash standartlariga mutlaqo javob bermaydi
“Biz bolalar ortopediya sohasida fizioterapiya muolajalari, jismoniy muolajalarni keng qo‘llaymiz. Lekin bunday tarzda massaj qilishga hech qachon yo‘l qo‘yilmaydi. Har bir fizioterapiya muolajasi, massaj qilish, umumiy massaj bo‘ladimi yoki qaysidir qisman, oyoq, qo‘l, umurtqa, bel massaj qilish, davolash strukturasini o‘tkazish o‘zining standartlari asosida olib boriladi. Bu standartlarda qaysi kasalga, qay vaqtda, qancha vaqt davomida qanaqa qilib massaj qilish hammasi yozilgan. O‘sha standartlar asosida olib boriladi. Men o‘sha videoda ko‘rgan massaj davolash standartlariga mutlaqo javob bermaydi.
Kichkina bolalar birinchi davolash muolajalarini olayotganda, misol uchun, qanaqadir inyeksiya bo‘ladimi, massaj bo‘ladimi, parafin qo‘yiladimi, elektroforez qilinadimi 2-3 yoshli bolalar, albatta, xavotirga tushadi, ta’sirlanadi. Shuning uchun ularga bunday muolajalarni qilishdan oldin hamshira yoki shu muolajani qilayotgan xodim bola bilan oldin kontaktga kirishib olish kerak. Bola massajga o‘rganguncha uni sal ko‘taradi, o‘ziga o‘rgatadi, keyin yengilroq massaj qiladi. Keyin shu muolajalarni bemalol qilish imkoni tug‘iladi. Biz ko‘rayotgan videolavhada bolani ovozi boricha baqirtiryapti. Bu shunaqangi asoratlarga olib kelish mumkinki, buni keyin umuman tuzatib bo‘lmaydi.
Masalan, bunday holatda birinchidan suyaklar zararlanishi, bo‘g‘imdan chiqib ketishi, suyak sinib qolishi yoki bo‘g‘im yuzasi surilib qolishi mumkin. Suyak zararlanmasa ham bo‘g‘imning atrofida paylar bo‘ladi, ular uzilib ketishi mumkin. Shuningdek, muskullar zararlanishi mumkin. Bunday qo‘pollik bilan davolashsa paylarga, muskullarga qon quyiladi. Chunki u qattiq tortiladi, qon quyiladi. Natijada bolaning issig‘i chiqadi. u shishib ketadi, og‘riydi, bo‘g‘imning ichida suv yig‘iladi, keyin bo‘lim yallig‘lanishi mumkin. Unda bu muolajadan oladigan foydadan ko‘ra zarari ko‘payib ketadi. Shuning uchun bunday davolash strukturasi qilinishiga mutlaqo ruxsat berilmaydi. Yuqorida men aytgan massajlar qilinganidan keyin davolash strukturasi qilinadi. Bunda ham birinchi muolajalar asta-sekinlik bilan ochib-yozib, bukib-yozib amalga oshiriladi. Unday qilinmasa o‘sha yuqorida aytgan asoratlar kuzatilishi mumkin.
Bu videoda ko‘rsatilayotgan massaj bolalar ortopediyasi kasallariga qilinadigan muolajalarga mutlaqo to‘g‘ri kelmaydi deb hisoblayman.
Ota-onalarga maslahatim, xususiy klinikalarga borishadigan bo‘lsa, albatta, ular bu sohadan bilimga egami, fizioterapiya, massaj, davolash fizkulturasi bo‘yicha o‘qigan sertifikatlarini so‘rashsa maqsadga muvofiq bo‘lardi.
Tuman, viloyat shifoxonalarida sertifikati, mutaxassisligi bo‘lmagan mutaxassislar bo‘lmasa ularga bu ish bilan shug‘ullanishga ruxsat berilmaydi”.
Ma’lumot uchun, tarqalgan xabarlarga Sog‘liqni saqlash vazirligi munosabat bildirdi. Unda qayd etilishicha, Chilonzor tumanidagi 38-oilaviy poliklinikada tasvirga olingani aytilgan uqalash seansi u yerda emas, balki ushbu muassasa binosining xususiy korxonaga tegishli bo‘lgan qismidagi xonalardan birida amalga oshirilgan.
“Massaj muolajasini bajargan shaxs B.Z. bilan suhbatda u mazkur faoliyat bilan shug‘ullanish uchun tegishli ruxsatnoma va sertifikatga, qolaversa, fizioterapiya yo‘nalishida diplom va malaka toifasiga ega emasligini ma’lum qilgan. Shu bois Sog‘liqni saqlash vazirligi yuqoridagi holatga huquqiy baho berish uchun huquq-tartibot idoralariga murojaat qilgan”. – deyiladi SSV xabarida.
Vazirlik axborotida aytilishicha, ayni paytda holat yuzasidan tekshiruv ishlari davom ettirilmoqda va ularning natijalari bo‘yicha qo‘shimcha ma’lumot beriladi.
Izoh (0)