Андижон вилоятининг Марҳамат туманида «ўқитувчиларни ота-оналардан кечирим сўратиш» воқеасидан сўнг ишда олинган ҳоким ўринбосари ўрнига янги раҳбар тайинланди. Бу ҳақда Марҳамат тумани ҳокимлиги матбуот хизмати «Дарё»га маълум қилди.
Марҳамат тумани ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимига Жаҳонгир Ғофуров тайинланган. У 1983 йилда Марҳамат туманида туғилган.
Жаҳонгир Ғофуров бунга қадар тумандаги «Ўқчи» маҳалласида ҳоким ёрдамчиси вазифасида ишлаб келган. Ундан аввал эса туманда маҳалла ва оилани қўллаб-қувватлаш масалалари бўйича бўлим бошлиғи – ҳоким ўринбосари вазифасида хизмат қилган.
Эслатиб ўтамиз, февраль ойида тумандаги 72-ихтисослаштирилган давлат умумтаълим мактаби ўқитувчиларини ота-оналардан узр сўрашга мажбур қилган ҳоким ўринбосари Мухторжон Қурбонов ишдан олинган эди. Унга нисбатан суд томонидан 2 миллион 700 минг сўм жарима жазоси тайинланган.
Маълум қилинишича, ҳозирда Мухторжон Қурбонов ҳокимлик тизимида ишлагани йўқ.
Аввалроқ Андижон вилоятининг Қўрғонтепа тумани «Чорвадор» маҳалла фуқаролар йиғинида ҳоким ёрдамчиси вазифасида ишлаб келган Маҳамадмусо Обидов Олтинкўл тумани ҳокими вазифасини бажарувчи этиб тайинланган эди.
Изоҳ (0)