«Президент маҳаллаларда бўлиб, одамлар билан суҳбатлаша бошлагач, вазият анча юмшади». Қорақалпоғистонлик журналист айни дамдаги вазият ҳақида

Қорақалпоғистонлик журналист Султонбек Зияевнинг «Дарё»га маълумот беришича, президент Шавкат Мирзиёевнинг Қорақалпоғистондаги маҳаллаларда бўлиб, аҳоли билан суҳбатлашиши вазиятнинг анча юмшашига сабаб бўлган.

«Тўғри, президентимиз ўтган сафар ҳам келиб кетганди. Аммо ундан сўнг кўчаларда ҳарбийлар кўпайиб, аҳолининг яна-да норозилигига олиб келди. Давлат раҳбарининг бу сафарги ташрифи ва одамлар орасига кириб, улар билан суҳбатлашиши вазиятнинг анча юмшашига, одамларнинг ҳовуридан тушишига олиб келди», — дейди Султонбек Зияев.

Журналистнинг айтишича, Қорақалпоғистонда бир ҳафта давомида интернетнинг яхши ишламаслиги одамларнинг тўғри ва аниқ ахборотни ўз вақтида ололмаслигига, шунингдек Конституция муҳокамаси ҳақида нотўғри қарашга эга бўлиши ва тўполонларга олиб келган.

«Кўпчилик Конституция муҳокамасини нотўғри тушунган. Бўлди, демак, шунақа вазият юзага келди деб хулоса қилишган. Бу ҳолат энди муҳокамага қўйилганини, ҳали бир қарорга келинмаганини тушуниб етмаган. Энг ёмони бир ҳафта давомида мобил интернет ҳам, симли интернет ҳам яхши ишламади. Бу эса одамларнинг ўз вақтида тўғри ахборот ололмаслигига сабаб бўлди. Мавҳумлик ортидан яна мавҳумлик келиб чиққач, вазият янада жиддийлашди», — дейди журналист.

Аввалроқ Шавкат Мирзиёевнинг Нукусдаги «Жекетерак» маҳалласидаги аҳоли билан мулоқот қилгани хабар берилганди.