“Prezident mahallalarda bo‘lib, odamlar bilan suhbatlasha boshlagach, vaziyat ancha yumshadi”. Qoraqalpog‘istonlik jurnalist ayni damdagi vaziyat haqida

Qoraqalpog‘istonlik jurnalist Sultonbek Ziyayevning “Daryo”ga ma’lumot berishicha, prezident Shavkat Mirziyoyevning Qoraqalpog‘istondagi mahallalarda bo‘lib, aholi bilan suhbatlashishi vaziyatning ancha yumshashiga sabab bo‘lgan.

“To‘g‘ri, prezidentimiz o‘tgan safar ham kelib ketgandi. Ammo undan so‘ng ko‘chalarda harbiylar ko‘payib, aholining yana-da noroziligiga olib keldi. Davlat rahbarining bu safargi tashrifi va odamlar orasiga kirib, ular bilan suhbatlashishi vaziyatning ancha yumshashiga, odamlarning hovuridan tushishiga olib keldi”, — deydi Sultonbek Ziyayev.

Jurnalistning aytishicha, Qoraqalpog‘istonda bir hafta davomida internetning yaxshi ishlamasligi odamlarning to‘g‘ri va aniq axborotni o‘z vaqtida ololmasligiga, shuningdek Konstitutsiya muhokamasi haqida noto‘g‘ri qarashga ega bo‘lishi va to‘polonlarga olib kelgan.

“Ko‘pchilik Konstitutsiya muhokamasini noto‘g‘ri tushungan. Bo‘ldi, demak, shunaqa vaziyat yuzaga keldi deb xulosa qilishgan. Bu holat endi muhokamaga qo‘yilganini, hali bir qarorga kelinmaganini tushunib yetmagan. Eng yomoni bir hafta davomida mobil internet ham, simli internet ham yaxshi ishlamadi. Bu esa odamlarning o‘z vaqtida to‘g‘ri axborot ololmasligiga sabab bo‘ldi. Mavhumlik ortidan yana mavhumlik kelib chiqqach, vaziyat yanada jiddiylashdi”, — deydi jurnalist.

Avvalroq Shavkat Mirziyoyevning Nukusdagi “Jeketerak” mahallasidagi aholi bilan muloqot qilgani xabar berilgandi.