Қашқадарё вилоятининг Қарши шаҳрида 2019 йилда ишлаб чиқарилган Cobalt ишлаб чиқарилишидан уч йил олдин — 2016 йилда гаровга олинган бўлиб чиқди. Бу ҳақда «Дарё»га депутат Бекзод Бердиев хабар берди.
Маълум қилинишича, депутат 2019 йилда ишлаб чиқарилган автомобилига 2016 йилда тақиқ қўйилгани ҳақида автомобилини сотиш ҳаракатига тушгандагина билган.
«Автомобильимни сотмоқчи эдим. Икки кун роса сарсон бўлдим. Олди-сотди шартномасини расмийлаштирамиз десак, автомобилингизга тақиқ қўйилган дейишди. Кейин билсам Қарши шаҳридаги 3-сонли нотариусда 2019 йилда ишлаб чиқарилган автомобилим 2016 йилда тақиққа қўйилган экан», — дейди бу ҳақда «Дарё»га хабар берган Бекзод Бердиев.
Туман кенгаши депутати эканини айтган Бекзод Бердиев ҳуқуқий билимга эга бўла туриб, шу муаммо сабаб икки кун сарсон бўлганини таъкидлаб, «Бу нотариусларимиз оддий халқни ойлаб сарсон қилар экан-да», — дейди.
Депутатнинг аниқлаштиришича, унинг давлат рақами 70 997 VAA бўлган автомобилига нотариус Матлуба Кенжаева томонидан 2016 йил 31 октябрь куни Қарши шаҳридаги 3-сонли нотариал идорада тақиқ қўйилган.
«Суриштириб билсам нотариус 2015 йилдаги гаров шартномасига кўра давлат рақами 70 997 UAA бўлган Cobalt’га тақиқ қўяман деб, давлат рақами 70 997 VАА бўлган 2019 йилда ишлаб чиқарилган машинамга тақиқ қўйган. Яъни автомобилнинг давлат рақамидаги бир ҳарфда адашилган», — дейди Бекзод Бердиев.
Мурожаатчининг қўшимча қилишича, у вилоят Адлия бошқармасига мурожаат қилгач, масъуллар ўз хатосини тан олиб, муаммони бартараф этишга киришган.
«Дарё»нинг бу ҳақдаги сўровига жавоб берган вилоят Адлия бошқармасининг жамоатчилик билан алоқалар бўлими масъули Шоҳида Шоимова ҳам хато тан олиниб, муаммо ҳал этилганини билдирди.
«Ҳолат кеча соат 14:00 да ҳал этилган. Мурожаатчининг мурожаати қаноатлантирилиб, тақиққа қўйилган автомобилидаги тақиқ олинган», — дейди бошқарма ахборот хизмати раҳбари.
Маҳаллий кенгаш депутати Бекзод Бердиев мазкур масала бошқа нотариусларга дарс бўлиши лозимлигини, ҳамма ҳам бирдек ҳақ-ҳуқуқини талаб қилавермаслигини айтиб, «ўз ҳақ-ҳуқуқларини яхши билмайдиган фуқароларни сарсон қилиш керак эмас-ку, наҳотки нотариусларимиз битта ҳарфнинг алмашиши бир инсон тақдирига, унинг иши ўз вақтида ҳал бўлмаслигига сабаб бўлишини англаб етмаса?», — дейди.
Изоҳ (0)