Заковатчилардан дастурчиларгача. «Янги Ўзбекистон» боғида ташкил қилинган 8 та павильондан репортаж

Кеча, 30 июнь куни «Янги Ўзбекистон» боғида ёшлар куни муносабати билан турли тадбирлар ташкил қилинди. Бу сафарги тадбирнинг аввалгиларидан фарқи боғда 8 та павильонлар ташкил қилинди. Хусусан:

• «Амир Темур» (шахмат) павильони
• «Мирзо Улуғбек» (заковат) павильони
• «Ал-Хоразмий» (IT) павильони
• «Алишер Навоий» (жадидчилар янги авлоди, ўзбек ва хорижий тиллар) павильони
• «Заҳириддин Муҳаммад Бобур» (китобхонлик) павильони
• Бўзатов «Ёшлар овози» павильони
• «Жалолиддин Мангуберди» (спорт) павильони
• «Ёш тадбиркорлар ва ҳунармандлар» павильони.

Хусусан, давлат раҳбари шахмат павильонида Президент мактаби битирувчилари ҳамда хорижда таҳсил олаётган битирувчи билан суҳбат қилди.

Заковат павильонида эса «Заковат интеллектуал клуби» нодавлат нотижорат ташкилотлари фаолияти юзасидан тақдимот ўтказилди.

Шавкат Мирзиёев кейинроқ ўз нутқида заковатчилар билан янги режалар ҳақида гаплашиб олганини айтди. «Биринчи ташаббусни Хоразмдан бошлайдиган бўлдик, эртага Хоразм вилояти ҳокими керакли топшириқларни олади», — дейди президент.

«Маҳаллалардаги ёшлар етакчилари энди ҳар бир кўча кесимида китобхонлик, «Заковат» ва бошқа интеллектуал ўйинларни йўлга қўяди. Бундай танловлар ҳар ҳафтада – маҳалла кесимида, ҳар ойда – туман миқёсида ва ҳар чоракда вилоят даражасида ўтказиб борилиши керак. Бу орқали 2 миллионга яқин ёшлар қамраб олинади», — дея қўшимча қилди Шавкат Мирзиёев.

IT павильонида эса «Tumaris.Tech» ва «Бир миллион дастурчи» лойиҳалари тақдимоти ўтказилди.

«Алишер Навоий» павильонида эса «WikiStipendiya» марафони, «Ибрат» тиллар оромгоҳи, «Митти коинот» болалар учун ўзбек тилидаги анимацион фильмлар ва видеоконтентлар фестивали, «Маtn.uz» платформаси лойиҳалари бўйича тақдимот қилинди.

Президент ўз нутқида википедияда ўзбек тилидаги мақолалар сонини 100 мингтага етказиш ва хорижий тилларда ҳам Ўзбекистон ҳақидаги маълумотларни жойлаштириш яхши самара бериши ҳақида айтди. Шавкат Мирзиёевнинг сўзларига кўра, ушбу мақсадлар учун 10 миллиард сўм маблағ йўналтирилади.

Китобхонлик павильонида эса ёшлар ўртасида китобхонликни тарғиб қилиш борасида амалга оширилаётган ишлар юзасидан суҳбат ўтказилди.

Бўзатов «Ёшлар овози» павильонида «Ёшлар овози» танлови якунлари ҳамда ёш ижодкорларни кашф этиш бўйича суҳбат бўлиб ўтди.

Спорт павильонида эса халқаро ва республика даражасидаги спортчилар билан қисқа учрашувлар бўлди.

Сўнгги, «Ёш тадбиркорлар ва ҳунармандлар» павильонида янги стартап лойиҳалар тақдимоти ўтказилди.