«ПСЖ» жамоани тарк этиши мумкин бўлган Неймарнинг ўрнига «Барселона» вингерини олиб келмоқчи

Неймар ёзда «ПСЖ»ни тарк этиши мумкин.

Француз клуби 30 ёшли футболчи билан хайрлашишга тайёр. «ПСЖ» Неймарни сотиш ёки ижарага олиш бўйича исталган таклифларни кўриб чиқмоқчи.

Парижликлар ҳатто бразилияликни бошқа клубнинг бир неча футболчисига алмаштиришга ҳам тайёр, дея хабар беради журналист Марсело Бехлер. Шу билан бирга «ПСЖ» Неймарга хайрлашишни хоҳлаётганини тўғридан-тўғри айтгани йўқ.

Футболчини бошқа жамоага ўтказиш қийин бўлади. Унинг маоши жуда катта тўсиқ бўлиши мумкин. У Францияда йилига 35 миллион евро маош олади. Ҳозирда ушбу маошни тўлайдиган жамоанинг ўзи йўқ.

Бразилияликнинг ўзи «ПСЖ»ни тарк этишни истамаяпти. У ЖЧ—2022 га тайёрланиш учун ўзи мослашган жамоада бўлишни хоҳламоқда. Ундан ташқари олаётган юқори маоши ҳам клубни тарк этмаслигига сабаблардан бири бўлиши мумкин.

«Барселона» бир неча бор Неймарни қайтаришга уриниб кўрди. Аммо энди молиявий муаммолар сабаб каталонияликлар футболчини ортга қайтара олмайди. Фақатгина инглиз клублари Неймарни ўз сафига қўшиб олиши мумкин.

Хабар қилинишича, Неймар жамоани тарк этадиган бўлса, «ПСЖ» «Барселона»дан Усмон Дембелени олиб келади. Аввалроқ, «Барселона»га футболчини 50 млн еврога сотиб олиш таклиф қилингани хабар қилинганди.

Неймар 2017 йилдан буён парижликлар шарафини ҳимоя қилиб келади. «ПСЖ» ҳужумчи учун «Барселона»га 222 миллион евро тўлаб берган эди. Бразилияликнинг амалдаги шартномаси 2025 йилда ўз ниҳоясига етади.

Бразилиялик 2021/22 йилги мавсум «ПСЖ» сафида барча мусобақаларда 28 та ўйинда иштирок этиб, 13 та гол ва 8 та голли узатмага муаллифлик қилди.