Тошкентдаги супермаркетларда рамбутан, питахайя (питайя), кумкват ва Австралиянинг йирик мангоси жорий ёз мавсумининг экзотик янгиликлари сифатида пайдо бўлди. Улар мамлакат пойтахтида жойлашган 6-8 та супермаркетда истеъмолчиларга таклиф қилинмоқда. Бу ҳақда EastFruit мутахассислари хабар берди.
2022 йилнинг 28 июнь куни Маkrо супермаркетлар тармоғи жорий мавсумда мева-сабзавотларнинг ёзги ассортиментини рамбутан, питахайя (питайя), Австралиянинг йирик мангоси ва кумкват (хитой мандарини) каби экзотик маҳсулотлар билан тўлдирганини маълум қилди.
Ушбу маҳсулотларнинг қимматлиги ҳисобга олинган ҳолда нархлар 100 грамм ёки бир дона учун кўрсатилган:
- рамбутан – 100 грамм учун 48 999 сўм, яъни 489 990 сўм/кг;
- питахайя (питайя) – 100 грамм учун 29 799 сўм, яъни, 297 990 сўм/кг;
- Австралиянинг йирик мангоси – бир дона учун 24 990 сўм;
- кумкват – 100 грамм учун 22 399 сўм, яъни 223 990 сўм/кг.
EastFruit экспертларининг қайд этишича, ўзбекистонлик истеъмолчилар ушбу маҳсулотларнинг айримлари билан таниш.
2019 йилнинг декабрь ойи охирида «Korzinka.uz» супермаркетлар тармоғи питахайя (питайя)ни бир донаси учун 25 990 сўм нархда таклиф қилган эди.
Кумкват кўчатлари Ўзбекистон ижтимоий тармоқларида 2019 йилнинг кузида маҳаллий боғбонларга таклиф қилина бошланган.
2020 йилнинг октябрь ойида эса ушбу кўчатлар нархи бир туп учун 100 минг сўмдан 200 минг сўмгача бўлган.
Изоҳ (0)