Бухоро шаҳридаги марказий деҳқон бозорида ёнғин содир бўлиб, бозорнинг 40 квадрат/метр майдони зарар кўрди. Бу ҳақда «Дарё»га вилоят Фавқулодда вазиятлар бошқармаси ахборот хизмати раҳбари Миржон Файзуллоев хабар берди.
Таъкидланишича, 2022 йилнинг 29 июнь куни Бухоро шаҳридаги «Марказий деҳқон озиқ-овқат бозори» МЧЖнинг орқа томонидаги Писташиканон кўчаси йўл ёқасида жойлашган бинода ёнғин келиб чиққан.
Соат 09:15 да вилоят Фавқулодда вазиятлар бошқармасига ёнғин ҳақидаги хабар келиб тушган. Ёнғинни бартараф этиш учун зудлик билан тўртта ўт ўчириш машинаси жалб этилган. Соат 09:26 да ёнғин содир бўлган атроф ўраб олинган ва ёнғин соат 09:59 да батамом ўчирилган.
«Ёнғин содир бўлган савдо дўкони якка тартибдаги тадбиркор Ҳилола Ғуломовага тегишли экани аниқланди. Ёнғин дўконда ўрнатилган электр симларда ортиқча юкланиш оқибатида содир бўлган. Тадбиркорга қарашли савдо дўконининг 40 квадрат/метр майдоннинг том қисми ва ичидаги барча матолари ёниб кетган. Ўз вақтида ёнғин хабари етказилмаганида, савдо дўкони жойлашган бинонинг 200 квадрат метри ҳам батамом ёниб кетиши мумкин эди. Фуқаролардан, айниқса, савдо ходимларидан ёнғин хавфсизлиги қоидаларига қатъий риоя қилишларини талаб қиламиз», — дейди Миржон Файзуллоев.
Билдирилишича, ёнғин сабаб тадбиркор катта зарар кўрган. Шунингдек, деҳқон бозорига тегишли бўлган савдо дўкони жойлашган бино ҳам ёнғин оқибатида зарарланган.
Айни пайтда ёнғин оқибатида келиб чиққан зиён миқдори аниқланмоқда. Жароҳат олганлар йўқ.
Изоҳ (0)