Turkiyaning Baykar Makina kompaniyasi Ukrainaga uchta Bayraktar TB2 dronlarini bepul beradi. Bu haqda kompaniyaning Twitter’dagi bayonotida aytilgan, deya xabar berdi “RBK”. Dronlarni sotib olish uchun mamlakat aholisi kraudfanding orqali pul yig‘gan edi.
“Bu maqsadga erishish uchun bir necha kun davomida ishbilarmonlar va oddiy odamlar katta-kichik miqdorda mablag‘ ajratdi. Baykar kompaniyasi TB2 uchun to‘lov olmaydi va uchta dronni Ukraina frontiga bepul yuboradi”, — deyiladi xabarda
TB2 sotib olish uchun yig‘ilgan pul Rossiya bosqini boshlanganidan keyin mamlakatni tark etgan ukrainalik qochqinlarga yordam berish uchun sarflanadi. BMT ma’lumotlariga ko‘ra, 21-iyun holatiga ko‘ra, 24-fevraldan beri Ukrainani 8 milliondan ortiq kishi tark etgan.
Ukraina turk dronlarini 2019-yil boshidan sotib olishni boshlagan. Bayraktar TB2 lardan kechasi ham kunduzi ham foydalanish mumkin, ular lazerli boshqaruv tizimlari bilan jihozlangan. Bitta qurilmaning jangovar yuki 8 kilometrgacha uchadigan to‘rtta raketadan iborat (ba’zi modifikatsiyalar uchun — 16 kilometrgacha).
May oyining oxirida Litvaning Laisves TV telekanali Ukrainaga Bayraktar sotib olish uchun mablag‘ yig‘ishni boshlagan edi. Telekanal 5,9 million yevro yig‘ishga muvaffaq bo‘ldi. Biroq Baykar kompaniyasi yig‘ilgan pul Ukrainaga insonparvarlik yordami uchun sarflanishi, Ukraina va Litva bayroqlari ranglariga bo‘yalgan dron esa sovg‘a qilinishi haqida jamoatchilik bilan kelishib oldi.
Izoh (0)