Россияда Chevrolet автомобиллари деярли тугади. Етказиб бериш эса тўхтатилган

Россияда Chevrolet автомобиллари тугаб бормоқда. Бу ҳақда Autostat хабар берди. 

UzAuto Motors АҚШ санкцияларига тушиб қолмаслик учун Россияга оммавий ишлаб чиқарилган Chevrolet моделларини етказиб беришни март ойида тўхтатган эди. 

Бугунги кунга қадар дилерлар барча захираларни деярли сотиб юборишди: Россиянинг турли ҳудудларида кам сонли Chevrolet Nexia ва Cobalt ҳали ҳам мавжуд, бироқ Spark аллақачон сотилиб кетган. 

Autoreview нашрининг ёзишича, апрель ойи ўрталарида Американинг General Motors концерни ўзи билан Cadillac ва Chevrolet премиум моделларини олиб, Россия бозорини тарк этган. 

Афтидан, оммавий сегментдаги Chevrolet автомобилларини етказиб бериш ҳам тикланмайди. Россия бозорида Spark, Nexia ва Cobalt моделларини тақдим этувчи Chevrolet расмий дистрибютори «Келес Рус» компанияси фаолиятини тўхтатди ва ҳатто ўз веб-сайтини ёпди. 

Россияга оммавий сегментдаги Chevrolet автомобилларини етказиб бериш ҳақиқатан ҳам тўхтатилди ва уларни қайта тиклаш тўғрисида қарор қабул қилинмади. Менимча, бу санкциялар режими умуман ўзгартирилсагина, содир бўлиши мумкин, — дейди «Келес Рус» ижрочи директори.

Chevrolet Spark Россияга Асака шаҳрида жойлашган UzAuto Motors заводи томонидан, Chevrolet Cobalt ва Nexia эса Қўстанай (Қозоғистон) шаҳридаги «СаряркаАвтоПром» заводидан етказиб берилган.

Аввалроқ General Motors Россияни бутунлай тарк этмоқчи эканлиги ҳақида хабар берилган эди.