Ўзбекистонда дам олиш куни 45 даражагача иссиқ бўлиши кутилмоқда

Ўзгидромет дам олиш кунлари учун об-ҳаво прогнозини эълон қилди.

Унга кўра, 24 июнь куни Ўзбекистоннинг текислик ҳудудлари бўйича бироз иссиқ об-ҳаво бўлиши кутилмоқда, фақат айрим тоғолди ва тоғли ҳудудларда қисқа муддатли ёмғир ёғиши, момақалдироқ бўлиши мумкин. Кўпчилик вилоятларда кундузи термометр устуни 36-39 даражага етади, шимолда, жанубда ва чўл ҳудудларда 40-42 даражагача бўлади.

25 июнь, шанба кунидан бошлаб Ўзбекистон ҳудудига Туркманистондан жуда иссиқ ва қуруқ ҳаво кириб келиши бошланади. Ҳаво ҳарорати кечаси 21-24 даража, кундузи 36-39 даража атрофида, шимолда, жанубда ва чўл ҳудудларда 42-44 даражагача иссиқ бўлади.

Якшанба куни ҳарорат фони кечаси 23-26 даражагача, кундузи 38-42 даражагача, шимолда, жанубда ва чўл ҳудудларда баъзи жойларда 43-45 даражагача кўтарилади.

Айрим тоғли ҳудудларда қисқа муддатли ёмғир ёғиши, момақалдироқ бўлиши мумкин, баъзи жойларда сел-сув тошқин ҳодисалари юзага келиши мумкин.

Эслатиб ўтамиз, республиканинг тоғолди ва тоғли ҳудудларида 23—27 июнь кунлари сел келиш хавфи эълон қилинган.