Қашқадарё вилоятининг Ғузор туманида 4 ёшли бола номаълум касалликдан вафот этгани, Соғлиқни сақлаш вазирлигининг махсус ишчи гуруҳи ҳолатни ўрганиш мақсадида Ғузор туманига юборилгани хабар берилганди. «Дарё» мухбирининг хабар қилишича, вафот этган боланинг 6 ёшли қариндоши ҳам кеча, 23 июнь куни оламдан ўтган.
«Афсуски, Соғлиқни сақлаш вазирлигининг ишчи гуруҳи етиб келгунга қадар 6 ёшли қизалоқ ҳам вафот этди», — дейди вилоят Соғлиқни сақлаш бошқармаси ахборот хизмати раҳбари Нуриддин Эгамов.
Масъулнинг қўшимча қилишича, 6 ёшли қизалоқ ва 4 ёшли боланинг қандай касалликдан вафот этгани шифокорларга маълум.
«Интернетда уларнинг номаълум касалликдан вафот этгани ҳақида хабар бериляпти. Аммо бу нотўғри. Болаларнинг қайси касалликдан вафот этгани шифокорларга маълум. Бироқ қонунчиликка кўра бемор ва унинг яқинлари розилигига кўра касаллик ташхиси жамоатчиликка ошкор қилиниши мумкин. Мазкур оила вакиллари бунга рози бўлмагани боис, бемор болаларнинг қайси касалликдан вафот этгани жамоатчиликка ошкор қилинмаяпти. Интернетда тарқалаётган гап-сўзлар, яъни шифокорлар қўлини қовуштириб ўтирибди деган гаплар туҳмат», — дейди бошқарма ахборот хизмати раҳбари.
Қўшимча қилинишича, 4 ёшли бола вафот этгач, мазкур оиланинг барча аъзолари тиббий кўрикдан ўтказилган.
«Оиланинг бошқа аъзоларида мазкур касаллик чиқмагани сабаб уларга уйига қайтишга рухсат берилган. Вафот этган болалар ковидга чалинмаган. Уларда коронавирус касаллиги чиқмаган», — дейди Нуриддин Эгамов.
Изоҳ (0)