Ўзбекистонда сўнгги бир ҳафта давомида коронавирус инфекцияси билан касалланганлар сонининг ўсиши кузатилди. Ушбу ҳолат юзасидан Санитария-эпидемиологик осойишталик ва жамоат саломатлиги хизматри бошлиғи Баҳодир Юсупалиев «Дарё»га изоҳ берди.
Соғлиқни сақлаш маълумотларига кўра, 17 июнь кунида 90 та, 18 июнь куни 108 та, 19 июнь куни 93 та, 20 июнь куни 87 та, 21 июнь куни 82 та, 22 июнь куни 98 та коронавирус билан касалланиш қайд этилган.
ЖССТ томонидан дунё мамлакатларида омикрон штаммининг Stealth-Omicron BA.2 варианти устивор штаммга айлангани такидланмоқда. Республикада ҳам ушбу штамм аниқланиб, ҳозирги кунда коронавирус инфекцияси билан касалланишда ушбу штаммнинг учраётгани кузатилмоқда.Аввалроқ Соғлиқни сақлаш вазирлиги дунёда омикроннинг янада юқумли мутацияси тарқалаётгани ҳақида маълумот берган эди. Унга кўра, халқаро экспертлар омикроннинг янги версиялари дунё бўйлаб кенг тарқала бошлаганидан хавотир билдиришган. БА.2.12.1 субварианти — шулардан бири.Инновацион ривожланиш вазирлигининг Илғор технологиялар марказида вирус геномини ўрганиш (секвенлаш) бўйича ўтказилган тахлилларда 67, фоизида омикрон ва 33 фоизида омикрон штаммининг янги мутациядаги Stealth-Omicron BA.2 варианти топилган.
Мамлакатда коронавирус инфекциясига қарши эмлашда қўлланилган жами вакциналар сони 57,7 миллион дозадан ошди. Улардан: биринчи босқич эмланганлар 20 миллион 550 минг нафарни, иккинчи босқичда эмланганлар 16 миллион 856 минг нафарни, учинчи босқич ва бустер доза билан эмланганлар 20 миллион 355 минг нафарни ташкил қилди.
Бугунги кунда мамлакатимизда коронавирус инфекцияси бўйича вазият барқарорлиги таъминланиб келинмоқда. Лекин ўтган 2 йил давомида айнан июль—август ойларида касалланиш кўтарилганлиги қайд этилган. Шунинг учун коронавирус инфекциясини тарқалишини олдини олиш мақсадида аҳолини коронавирус инфекциясига қарши эмлаш ва бустер дозаси билан қайта эмлаш ишларини жадаллаштириш катта ахамиятга эга.
Баҳодир Юсупалиев
«БА.2.12.1 бошқа мутацияларга нисбатан антитаначаларга осонроқ «чап бериш» хусусиятига эга. Қолаверса, юқувчанлиги, трансмиссивлиги омикроннинг БА.2 версияга нисбатан 23-27 фоиз юқори», – дейилади вазирлик ахборотида.
Қўшимча қилинишича, мазкур мутациянинг ўчоғи Нью-Йорк шаҳри ҳисобланади. У бутун Қўшма Штатларни шиддат билан «забт» этмоқда. Ҳатто мамлакатнинг қатор штатларида аллақачон доминантга айланиб улгурган.
Маълумот учун, Ўзбекистонда 22 июнь ҳолатига кўра коронавирус инфекцияси билан касалланганлар сони 239 минг 895 нафарни ташкил этган. Улардан 237 минг 791 нафари яъни 99 фоиз соғайган, 1 минг 637 нафари вафот этган.
Касаллик манбаи, жумладан: 35-40 фоиз ҳолатда оиладан, 15-20 фоиз ҳолатда бемор кўшнилари ёки қариндошларидан, 7-8 фоиз ҳолатда жамоат жойларида, 5-8 фоиз ҳолатда иш жойида юқтириб олингани аниқланган.
Жаҳон соғлиқни сақлаш ташкилотининг маълумотига кўра жорий йилнинг 22 июнь ҳолатига дунёда 544 миллион нафардан ортиқ беморларда коронавирус инфекцияси аниқланган, улардан 6 миллион 300 минг нафари вафот этган.
Изоҳ (0)