Tesla автомобиллари 1 июлдан бошлаб камида икки ой давомида Хитойнинг Бейдайхе шаҳрига кириши тақиқланади. Бу ҳақда Reuters хабар бермоқда.
Ҳозирча расмийлар нима сабабдан бу қарорга келгани ҳақида маълумот берилмаган. Тез орада сабаблар айтилиши кутилмоқда.
Пекин шарқидаги соҳил курорти Бейдайхе анъанавий тарзда Хитойнинг юқори мартабали раҳбарларининг ёзги конклавига мезбонлик қилади. Унда улар ёпиқ эшиклар ортида кадрлар ҳаракати ва сиёсат ғояларини муҳокама қилади.
Хитой одатда учрашув саналарини расман эълон қилмайди.
Ўтган йили Хитой ҳарбийлари Tesla электромобилларига ўз мажмуаларига киришни тақиқлаб қўйган эди. Бунга машиналарда ўрнатилган камералар хавфсиз эмаслиги сабаб қилиб кўрсатилган.
Маск ўшанда Tesla автомобиллари Хитойда ҳам, бошқа жойда ҳам жосуслик қилмагани, агар шундай қилса, компания ёпилишини айтган эди.
Бир неча ой ўтгач, Tesla Хитойда сотиладиган автомобиллар томонидан яратилган барча маълумотлар мамлакатда сақланишини айтди.
Tesla электромобилларида ҳайдовчиларга тўхташ жойи, йўлни ўзгартириш ва бошқа функцияларда ёрдам берадиган бир нечта ташқи камералар мавжуд.
Tesla’нинг Шанхайдаги заводи ўтган йили АҚШ автомобиль ишлаб чиқарувчиси дунё бўйлаб етказиб берган 936 мингта автомобилнинг ярмини ишлаб чиқарди.
Бироқ, бу йил завод Шанхайдаги блокировка туфайли тўхтаб қолди, бу эса заводни рекорд даражадаги 22 кунга ёпишга мажбур қилди.
Аввалроқ Tesla барча электромобилларининг нархини ошириши ҳақида хабар берилган эди.
Изоҳ (0)