Ўзбекистон банкларида июнь ойида автокредитлар бўйича вазият қандай?

Ҳозирги кунда Ўзбекистондаги 33 та банкдан 21 таси автокредитлар таклиф қилмоқда. Уларда кредитнинг йиллик фоиз ставкалари 21 фоиздан 29 фоизгача бўлмоқда.

Фоиз ставкалари аввалги ойларга қараганда баландроқ бўлмоқда. Ҳозирда ҳеч қайси банкда 20 фоиздан пастроқ автокредитлар берилмаяпти. 

Мақолани тайёрлашда Марказий банкнинг «Банк хизматлари» сайтидаги маълумотлардан фойдаланилган.

Фоиз ставкалари бўйича 

Энг паст фоиз ставкасини «Асакабанк» ва «Ўзсаноатқурилишбанк» таклиф қилмоқда — 21 фоиз. «Асакабанк»да 21 фоизлик кредитнинг муддати 36 ойгача, «Ўзсаноатқурилшбанк»да эса 12 ой.

Ҳар иккала банкда ҳам паст кредит фоиз ставкаларидан фойдаланиш учун бошланғич бадал камида 50 фоиз бўлиши керак. 

22 фоизлик автокредитни бир йўла 7 та банк тақдим қилмоқда:

• «Миллий банк»
• «Orient Finance Bank»
• «Пойтахтбанк»
• «Ипак йўли банк» (21,9)
• Ziraat bank
• «Trastbank»

Энг юқори фоиз ставкали автокредит «Равнақбанк»да бўлмоқда — 29 фоиз. 

Бошланғич тўлов бўйича

Бошланғич бадал тўлови энг кам бўлган автокредит «Ипак йўли банк»да — 0 фоиз. «Алоқабанк» эса автомобилнинг 10 фоиз бошланғич тўлови тўланиш шарти билан кредит таклиф қилмоқда. 

 «Туронбанк» ва «Тенгебанк»да бундай кредитлар 20 фоиздан кам бўлмаган тўлов амалга оширилгандан кейин берилмоқда.

Муддати бўйича 

Автокредит муддати бўйича энг узоқ таклиф 5 йил ёки 60 ойгача бўлмоқда. Булар қуйидаги банклар:

• «Асакабанк» — 21 фоиз;
• «Миллийбанк» — 22-26 фоиз;
• «Ипак йўли банк» — 25,9-26,9 фоиз.

Имтиёз даври бўйича

Айрим банклар томонидан кредит учун имтиёзли давр ҳам берилмоқда. Бунда энг узоқ муддат — 6 ой. Қуйидаги банклар 6 ойлик имтиёзли автокредитларни таклиф қилмоқда:

• «ИнФинбанк» — 26,99 фоиз;
• «Миллийбанк» — 22-26 фоиз;
• «Ўзсаноатқурилишбанк» — 21-25 фоиз.

Миқдори бўйича 

«Равнақбанк»да автокредитлар миқдори чекловларсиз бўлмоқда. Фоиз ставкаси — 26-29 фоиз.

«Инфинбанк» ва «Даврбанк»да автомобиль сотиб олиш учун кредитнинг максимал миқдори 1 млрд сўм этиб белгиланган. 

Иккиламчи бозор учун кредитлар

Эски автомобилларни сотиб олиш учун ҳам кредит берилмоқда. Бу турдаги автокредитлар ҳозирда 7 та банкда мавжуд:

• «Ҳамкорбанк» — 25 фоиз;
• «ИнФинбанк» — 26,99 фоиз;
• «Тенгебанк» — 25,9-26,9 фоиз;
• «Капиталбанк» — 25 фоиз;
• «Туронбанк» — 26-27 фоиз;
• «Даврбанк» — 26 фоиз;
• «Ипотекабанк» — 26 фоиз, 

Бундан ташқари «Asia Alliance Bank» Kia автомобиллари учун йиллик 6,5 фоиздан автокредит таклиф қилмоқда. Бунда кредитнинг бошланғич тўлови 50 фоиз бўлиши керак.