21 июнь куни соат 17:30 ларда Жиззах вилоятининг Ғаллаорол туманида содир бўлган йўл-транспорт ҳодисаси оқибатида юк машинаси салонига қисилиб қолган ҳайдовчи қутқарилди. Бу ҳақда вилоят ФВБ матбуот хизмати хабар берди.
Маълум қилинишича, М39 Олмаота—Тошкент—Термиз халқаро автомобиль йўлининг Жиззах вилояти Ғаллаорол тумани ҳудудидан ўтувчи 1013-километрида ҳаракатланиб кетаётган DAF русумли юк автомашинасининг тормоз тизими йўлнинг тик нишаблик қисмидан тушишда ишламай қолган. Оқибатда у олдиндаги «Газ-53» ва Isuzu русумли юк автомашиналарига урилиб, йўл-транспорт ҳодисаси содир этган.
Натижада Isuzu ҳайдовчиси автомобиль салонида қисилиб қолган. Воқеа жойига етиб келган вилоят ФВБ ёнғин-қутқарув отряди ходимлари томонидан махсус ускуналар ёрдамида ҳайдовчи қутқарилиб, тиббиёт ходимларига топширилган.
Таъкидланишича, ҳозирда ҳайдовчининг аҳволи яхши.
Аввалроқ Самарқандда 8 метрли қудуқда ҳушини йўқотган эркак қутқариб олингани, Чироқчида артизан қудуққа тушиб кетган 6 ёшли бола бир кун ўтиб қутқарилгани тўғрисида хабар берилганди.
Мавзуга доир:
Изоҳ (0)