Қашқадарё вилоятининг Деҳқонобод тумани ҳокими Зоир Алиқулов туманда ёшлар бандлигини таъминлаш ва касб-ҳунар мактаби битирувчиларини ишга жойлаштириш масаласида фикр билдириб, «Деҳқонободда деярли барча хонадонларга ичимлик суви қувури тортилмоқда. Аммо бизда ҳалигача сантехник йўқ», деди. Бу ҳақда ҳоким мактаб битирувчилари билан мулоқотида гапириб, масъулларга таклиф берганини айтиб ўтган.
«Тумандаги касб-ҳунар мактаблари, коллежлар туман учун керакли кадрни тайёрласин. Масалан бугунги кунда туманда аҳоли хонадонларига ичимлик суви қувурлари тортилмоқда. Ҳар бир хонадонга тоза ичимлик суви кириб боряпти. Демак, аҳолида сантехник хизматига эҳтиёж бор. Лекин энг ёмони бизда сантехник етарли эмас. Ҳолбуки, ҳар йили касб-ҳунар коллежлари ва касб-ҳунар мактабларини юзлаб ёшлар битирмоқда. Лекин аксарияти иш топишда қийинчиликка учрамоқда», — деди туман ҳокими.
Ҳоким ҳудуддаги касб-ҳунар мактаблари тумандаги мавжуд иш ўринлари учун мутахассис тайёрлаб бериши кераклигини, шунингдек касб-ҳунар мактаби битирувчиларини ишга олган ташкилотларга қўшимча имтиёз берилиши керак деган таклифни ўртага ташлаган.
«Коллеж ва касб-ҳунар мактабларини тамомлаган ёшларни ишга қабул қилган корхона ва ташкилотларга қўшимча имтиёзлар бериш керак. Масалан иш ҳақи, ижара тўловларини тўлаш масаласида енгиллик берсак, бунга қизиқиш пайдо бўлади», — деган туман ҳокими мазкур масалада фикр билдирар экан.
Туман ҳокимининг айтишича, ҳудуддаги «Дуоб», «Теракли», «Ойбек» ва «Оққишлоқ» маҳалла фуқаролар йиғинлари туман марказидан 180—230 км узоқликда жойлашган, ҳудуд ёшлари касб-ҳунар эгаллаш учун узоқ масофадан туман марказига келиб ўқиш имкониятига эга эмас.
«Президентимизнинг 2019 йил 6 сентябрдаги фармонига асосан ‘Дуоб’ маҳалласида жойлашган қуввати 405 ўринли Деҳқонобод хизмат кўрсатиш касб-ҳунар коллежи 50 ўринли ётоқхонаси билан Қарши муҳандислик-иқтисодиёт институтига кўп тармоқли ўқув марказлари ва амалиёт полигонларини ташкил этиш учун ажратиб берилган. Аммо уч йилдан буён Қарши муҳандислик-иқтисодиёт институти бинодан фойдаланмаган. Бино бўш турибди. Бинодан мақсадли фойдаланиш мақсадида коллеж биносида касб-ҳунар мактаби ташкил этилса, ҳудуддаги тўртта маҳаллада яшовчи касб-ҳунар эгаллаш истагида бўлган ёшларга қулайлик яратилган бўлар эди», — дейди туман ҳокими масъулларга берган таклифлари ҳақида гапирар экан.
Деҳқонобод ҳокимининг маълумот беришича, 2020—2021-ўқув йилида тумандаги умумий ўрта таълим мактабларини жами 2394 нафар ўқувчи тамомлаган бўлиб, шундан 438 нафари Олий таълим муассасаларига, 264 нафари касб-ҳунар мактабларига, 243 нафари коллежларга ўқиш ва касб-ҳунар эгаллаш учун ўқишга қабул қилинган.
«2021 йилда тумандаги касб-ҳунар коллежларини тамомлаган 384 нафар битирувчининг 169 нафари ёки 44 фоизи эгаллаган мутахассисликлари бўйича ишга жойлашган. Қолган 56 фоизи ёки 215 нафари бошқа соҳада ишлашга мажбур бўлмоқда. Кейинги уч-тўрт йилда туманда чорвачиликни ривожлантиришга алоҳида эътибор қаратилганлиги, тадбиркорлар томонидан писта ва коврак плантациялари ташкил этилганлиги эътиборга олиниб, ветеринария, зоотехника, доривор ўсимликларни етиштириш ва қайта ишлаш мутахассиси, сантехник хизмати кўрсатувчи йўналишларида кадрлар тайёрланса мақсадга мувофиқ бўлади», — деди ҳоким.
Ҳоким шунингдек, мулоқотда мактаб битирувчиларига яхши ўқиб, келажакда тумандаги мавжуд ишлар учун керакли мутахассис бўлиб етишишни таклиф қилган.
«Сизларга ўзимнинг ҳаётимдан мисол келтирмоқчиман. Мен ҳам 25 йил олдин худди Сиздек ёш битирувчи эдим. Кечани кеча кундузни кундуз демасдан ўқидик. Кези келганда пул топиш учун кўчага чиқдик. Энди Сизлар мустақил ҳаётга биринчи қадамингизни қўйдингиз. Сиз эртага ҳоким, шифокор, прокурор, ички ишлар ходими бўлишингиз керак. Орзу ҳавас билан мақсадларингиз муштарак бўлсин. Ўқинг, изланинг, тўхтаб қолманг», — деган туман ҳокими.
Изоҳ (0)