Конституциявий комиссиянинг навбатдаги йиғилишида Олий Мажлис қонунчилик палатаси спикери ўринбосари Акмал Саидов ҳозирда аҳолидан кунига қанча таклиф келиб тушаётгани тўғрисида маълумот берди.
Саидовга кўра, хатлар орқали, газета, радио, телевидениеда билдирилган, маҳаллаларда ўтказилган ўрганишларда аҳоли томонидан айтилган таклифлар жамланган. Конституциявий комиссия раиси ўринбосари Қутбиддин Бурҳонов мана шу йўналишдаги ишлар тўғрисида мунтазам равишда комиссияга ахборот бериб борган.
«Қолаверса, ноанъанавий шаклда, яъни янги информацион технологияларни қўллаган ҳолда конституциявий ислоҳотларнинг муҳокамаси бошланди. Биринчи марта ‘Менинг конституциям’ онлайн платформаси ташкил этилди, Call-марказ, электрон почта очилди, махсус Telegram-бот ишга туширилди. Фуқароларимиздан конституциявий ислоҳотларга муносабат билдиришни сўраб, 3 июнь, 8 июнь ва 15 июнь кунлари бутун Ўзбекистон аҳолисига, яъни 30 миллиондан ортиқ мобил алоқа эгаларига SMS’лар жўнатилди», — дейилади хабарда.
Унинг таъкидлашича, бу ишларнинг ижобий натижасини келиб тушаётган таклифлар сони кескин ортганидан кўриш мумкин. «Илгари кунига 500 та атрофида таклиф келиб турган бўлса, аҳолини ахборот технологиялари воситалари орқали хабардор қилиш жараёнлари бошлангандан кейин кунига 5-6 мингта таклиф тушмоқда», — дейди у.
Аввалроқ Акмал Саидов аҳолининг жабрланган тоифаси ўлим жазосини тиклаш тарафдори эканини айтиб, конституциянинг 24-моддасига «Ўзбекистонда ўлим жазоси тақиқланади», деган жумлани қўшиш таклифини билдирганди.
Изоҳ (0)