Сурхондарёда ичимлик сувидан ноқонуний фойдаланганлар маъмурий жавобгарликка тортилди. Бу ҳақда «Сурхондарё сув таъминоти» МЧЖ ахборот хизмати хабар берди.
Маълум қилинишича, Уй-жой коммунал хизмат кўрсатиш вазирлиги ҳузуридаги Ичимлик сувидан фойдаланишни назорат қилиш инспекцияси ҳамда «Сурхондарё сув таъминоти» МЧЖ ҳамкорликда вилоятда ичимлик сувидан белгиланган қоидалар асосида фойдаланишни назорат қилиш, аниқланган ноқонуний ҳолатларни бартараф этиш бўйича ташкил этилган ишчи гуруҳи Бойсун туманида рейд тадбирларини ўтказган.
Шу кунга қадар истеъмолчилар томонидан Хўжамайхона—Бойсун марказий ичимлик суви тармоғига ноқонуний уланиш ҳолатларининг 30 таси «Дарбанд» ва 3 таси «Ҳунармадлар» МФЙда аниқланган. Келтирилган зарар миқдори 368,7 миллион сўмдан ортиқ бўлиб, қайта тармоққа уланиш харажатлари 22,2 миллион сўм — жами зарар 390,9 миллион сўмни ташкил этмоқда.
Ҳозирда ҳуқуқбузарларга нисбатан Маъмурий жавобгарлик тўғрисидаги кодексга асосан маъмурий баённомалар расмийлаштирилган ва тармоқдан узиб қўйилган.
Аввалроқ Наманганда ичимлик суви бўлмаган 109 та маҳалланинг 29 таси 2022 йилда ичимлик суви билан таъминланиши маълум қилинганди.
Изоҳ (0)