«Битирувчиларнинг 86 фоизи иш билан таъминланяпти» — олий таълим вазири

Ҳар йили Ўзбекистон олий таълим муассасалари битирувчиларининг 86 фоизи иш билан таъминланмоқда. Бу ҳақда 16 июнь куни АОКАда бўлиб ўтган матбуот анжуманида Олий ва ўрта махсус таълим вазири Абдуқодир Тошқулов маълум қилди, дея хабар бермоқда «Дарё» мухбири.

Матбуот анжуманида вазир «Дарё» мухбирининг саволига жавобан, неча фоиз битирувчи иш билан таъминланаётганини айтди. Абдуқодир Тошқуловнинг таъкидлашича, аксарият битирувчилар ўзи ўқиган мутахассислик бўйича ишламаяпти.

«Ҳозирда 86 фоиз битирувчилар иш билан таъминланмоқда. Сиздаги қўрқув менда ҳам бор. Эртага мигрантларимизнинг асосий қисми бизнинг контингент бўлиб қолмайдими, деган хавотир йўқ эмас. Баъзида яндекс таксига ҳам ўтириб, аҳоли фикрларини ўрганганимизда ҳам таксистларнинг аксарияти талаба бўлиб чиқяпти. Бу ханжарни юракка уриш билан баробар. Мен шу тизимга агар жавоб берадиган хизматда бўлсам, бу мен учун ҳузур бағишламаган. Мана шу 86 фоиз ҳам ўзининг мутахассислиги бўйича эмас, дуч келган жойда ишлаб кетяпти», – деди вазир.

Абдуқодир Тошқулов имтиҳонларни осонлаштириб, ўқиш битиришни мураккаблаштириш борасида ҳам фикр билдирди.

Дунёда ўқишга кириш осон, битириш қийинлигини кўп айтамиз. Лекин бизда ўқишга кириш оғир-у, ўқиш осонроқ. Шунинг учун ҳам давлат олий таълим муассасаларига бу йил квоталар кўпайтирмаймиз. Чунки талабалар сони кўпайиб кетди. Имтиҳонларда тестдан олдин ҳам нималардир қўйишимиз керак. Тестни енгиллатишимиз лозим. Ўзи тестлар анча осонлашди, лекин яна ҳам енгиллаштириш керак. Энг муҳими, таълим жараёнидаги сифатни яхшилаш зарур. Билими етмайдиган одам: «мен у университетда ўқий олмайман», дейдиган даражага чиқишимиз керак. Ҳозир Тошкент тиббиёт академиясига нисбатан шунақа қараш шакллана бошлаган. Бунинг учун қадамлар қўйиляпти. Масалан, ўқишни кўчириш жуда оғриқли нуқта эди. 100 минг нафар талаба ва уларнинг ота-оналари керак бўлса, ижтимоий тармоқларда бизни тил билан айтганда қарғади ҳам. Уни ҳам ўқидик. Эртага ректордан шароитни қилиб бердик, энди сифатни оширинг, деб сўраймиз. Кўп нарса раҳбарга боғлиқ экан. Битта университет ректори кўп самарали ишлар қилиши мумкин. Лекин жуда аянчли аҳволга олиб келиш эҳтимоли ҳам бор. Таълим муассасаси раҳбари эпласа ишлаши керак. Ҳозир хориждан тўлиқ ўқув режасини сотиб олиб келяпти ва бирдан тизим ўзгариб кетяпти. Ҳамма имконият берилди. Божхона божларисиз адабиёт олиб кела олади. Китобларни таржима қилдира олади. Чеклов йўқолди. Лекин бу мустақилликни ўзлари ва ўқитувчиларига устама ёзиш деб тушунмаслик керак. Таълим сифатини ошириш шарт.

Абдуқодир Тошқулов, олий ва ўрта махсус таълим вазири