Подиумдан ҳокимиятгача: сиёсатчи ва шаҳзодалар билан ҳаёт йўлини боғлаган моделлар (фото)

Аксарият сиёсатчи ва шаҳзодалар ўзига рафиқа сифатида моделларни танлайди. Grazia нашри уларнинг бир нечтаси билан таништириб ўтди.

Мелания Трамп

Мелания Кнаусс (қизлик фамилияси) ва Дональд Трамп ўртасидаги биринчи учрашув 1998 йилда Нью-Йоркдаги зиёфатда бўлиб ўтган. Бу вақтда Қўшма Штатларнинг бўлажак биринчи хоними аллақачон моделликда муваффақиятга эришган эди. Сўнгра у Словениядан АҚШга кўчиб ўтди ва у ерда карьерасини қуришга қарор қилди. Ўша пайтда модель 28, Трамп эса 52 ёшда эди. Бироқ сезиларли ёш фарқи муносабатларни давом эттиришга тўсқинлик қилмади.

«Дональд Трамп ҳақида ҳеч нарса билмасдим, менинг ўз ҳаётим бор эди», — дейди Мелания. Оддий суҳбатдан сўнг Трамп ундан телефон рақамини сўради, бироқ кутилмаганда рад жавобини олди. Бунинг ўрнига Мелания бизнесменнинг ўзига рақам қолдиришини таклиф қилди. «Эркак киши берган рақамга қараб, у ҳақида кўп нарсаларни айтиб бериш мумкин. У барча рақамларини менга қолдирди», — деди Трампнинг рафиқаси. Узоқ кутилган телефон қўнғироғи фақат бир ҳафта ўтгач юз берди.

Бир нечта учрашувлардан сўнг севишганлар том маънода ажралмас жуфтликка айланди. 2004 йилда улар унаштирилганини эълон қилинди — Дональд келинга 1,5 миллион долларлик ажойиб олмосли узук совға қилди. «Бу ажойиб сюрприз бўлди. Биз бирга жуда бахтлимиз», — деди бўлажак Трамп хоним. 2005 йил 22 январда жуфтлик Дональднинг Мар-а-Лаго мулкида турмуш қурди.

Мелания Дональднинг учинчи хотини ҳисобланади: биринчи хотини Ивана Трамп бўлиб, у билан 15 йил яшаган. Иккинчиси — актриса Марла Маплес бўлиб, унинг никоҳи 6 йил давом этди. Никоҳ базмида Мелания бир нечта тўй либосларини ўзгартирди, улардан бири Жон Галяно томонидан Christian Dior учун яратилган. Унинг нархи 100 дан 200 минг долларгача баҳоланмоқда. Тўйдан тахминан бир йил ўтгач, 2006 йил 20 мартда Дональд ва Мелания оиласида қувончли воқеа юз берди — уларнинг биринчи фарзанди Баррон Трамп дунёга келди. 2017 йилнинг 20 январида Дональд Трамп расман АҚШнинг 45-президенти бўлди, Мелания эса Оқ уйнинг биринчи хоними ва бекаси мақомини олди.

София Хеллквист 

София Хеллквистнинг ҳаёти Золушка қиссасини эслатади. Швециялик модель кичик шаҳарчада туғилган. Ўрта мактабни тугатгандан сўнг қиз карьера қуриш учун Стокгольмга кўчиб ўтди. Швеция шаҳзодаси Карл Филипп билан учрашишдан олдин у эркаклар журналининг муқовасида чиқишга муваффақ бўлди.

София машҳурликка эришгач, Нью-Йоркка кўчиб ўтишга қарор қилди. Бир неча йил ўтгач, Хеллквист ўз ватанига қайтиб келди ва у ерда бўлажак турмуш ўртоғи билан учрашди. Шаҳзода Карл Филипп билан танишув Швециядаги ресторанлардан бирида бўлиб ўтди. Ажабланарлиси шундаки, Вармланд герцоги Софиянинг карьерасидан умуман хижолат тортмади. 2014 йилда жуфтлик тўрт йиллик муносабатлардан кейин турмуш қурди. Ҳозир улар уч фарзандни биргаликда тарбияламоқда.

Кендра Спирс

Шаҳзода Раҳим Ага Хоннинг рафиқаси, модель Кендра Спирс мода саноатдаги фаолиятини 2008 йилда бошлаган. У моделлик бизнесида жуда талабчан бўлишига қарамай, у кўпроқ оилавий ҳаётни орзу қиларди. 5 йил ўтгач, 2013 йилда Кендра ўзининг бўлажак умр йўлдошини учратди. Раҳим унга шунчалик мафтун бўлиб қолганки, танишганларидан тўрт ой ўтиб унга турмуш қуриш таклифини билдирган.

Ўз севгилиси билан турмуш қуриш учун модель эътиқодини ўзгартирди ва карьерасини тарк этди. Унда севимли одамига яқин бўлиш истаги муҳимроқ бўлиб чиқди. Бугунги кунда жуфтлик икки фарзандни тарбияламоқда, Кендра исмини ҳам ўзгартирган — энди у малика Салва Ага Хон.

Карла Бруни

Супермодель Карла Брунининг Франциянинг 23-президенти Николя Саркози билан танишуви 2007 йилнинг ноябрь ойида кечки овқатлардан бирида бўлиб ўтган. Ўша пайтда сиёсатчи 25 йил давомида турмуш қурган рафиқаси Сесилия Аттиас билан ажрашган эди.

«Мен бундай самимий ва зукко одам билан учрашишни кутмаган эдим. Унинг кўриниши ва ақл-заковати мени ўзига тортди. Аёл сифатида мен учун бу учрашув мулойимлик, ишонч, мулоқот ва ўзаро тушуниш нуқтаи назаридан муҳим ва кутилмаган бўлиб чиқди», — дейди Бруни ўз таржимаи ҳолида. Биринчи учрашувдан бир неча ой ўтгач, 2008 йил февраль ойида жуфтлик никоҳдан ўтди. 2011 йилда улар оиласига янги меҳмон ташриф буюрганини эълон қилди, жуфтикнинг Жулия исмли қизи бор.