Хитойнинг 150 га яқин компаниялари аудит бўйича жорий қилинган янги қоидалар туфайли делистингга учраши ёки АҚШ биржасидан ўз хоҳишига кўра чиқиб кетиши мумкин. Бу ҳақда Япониянинг Nikkei агентлиги хабар тарқатган. АҚШда мазкур қоидалар 2020 йил охирида қабул қилинганди.
Янги қонун бўйича хориж эмитентларига қўйган талабга мувофиқ улар ўз давлатларида ҳукумат ёки унга қарашли ташкилотга тегишли эмасликларини исботлайдиган далил тақдим этиши талаб қилинади.
«Агар АҚШда компанияларнинг оммавий ҳисобдорлигини назорат қилувчи қўмита эмитентлар ҳисоботини текшира олмаса эмитент тегишли ҳужжатларни тақдим этишга мажбур. Агар қўмита эмитентнинг ҳисоботларини кетма-кет уч йил ичида тегишли текширувдан ўтказа олмаса, у ҳолда хориж компаниясининг АҚШ миллий биржаларидаги акциялари савдоси тақиқланади»,— дейилган қонунда.
Аввал маълумотларни тақдим этишнинг энг охирги вақти 2024 йил деб белгиланган бўлса, Nikkei хабарига кўра америкалик конгрессменлар ушбу муддатни 2023 йилга суришни истамоқда. Яъни хориж компаниялари жорий йил охиригача ваколатли органга ҳисобот топшириши ёки уларнинг акциялари сотиладиган АҚШ биржасини тарк этиши лозим.
Ўтган ҳафтада Хитойнинг Диди такси хизматлари сервиси ОТC ички бозорида биржада савдо қилишни бошлади ва Ню-Ёрд фонд биржасидан чиқиб кетди. Nikkei агентлиги ўнлаб Хитой компаниялари, хусусан Baidu интернет қидирув портал ҳам Диди ортидан бориши мумкинлигини тахмин қилган.
Изоҳ (0)