Осиё футболи конфедерацияси Тартиб-интизом қўмитаси U-23 Осиё Кубоги—2022 чорак финали доирасида ўтказилган Ўзбекистон ва Ироқ терма жамоалари ўртасидаги ўйинда юз берган ҳолатлар бўйича қарор чиқарди.
ОФК Тартиб-интизом қўмитаси юзага келган вазиятларни ўрганиб чиқиб, Ўзбекистон U-23 терма жамоаси футболчиси Абдувоҳид Неъматовга нисбатан 3 та ўйинга четлатиш (дисквалификация) ва жарима (500 АҚШ доллари) интизом чорасини қўллаш, Олимпия терма жамоасининг ярим финал доирасида Японияга қарши учрашувини мухлисларсиз ўтказиш ҳамда Ўзбекистон футбол ассоциациясига жарима интизом чорасини қўллаш юзасидан қарор чиқарди.
Шунингдек, Тартиб-интизом қарорига кўра, ярим финал доирасидаги баҳсга 500 нафаргача япониялик футбол ишқибозлари киришига рухсат берилди.
Бундан ташқари, Ўзбекистон – Ироқ учрашувида стадионда хавфсизликни етарлича таъминланмагани ва ОФК талабларини бажарилмагани учун ЎФА 50 минг АҚШ доллари миқдорида жаримага тортилади.
Эслатиб ўтамиз, Осиё Кубоги—2022 1/4 финали доирасидаги Ироққа қарши кечган баҳснинг биринчи бўлим бошида ҳакамнинг қарорлари ва рақиб футболчиларидан норози бўлган айрим мухлислар майдон ҳамда техник ҳудуд томон қаттиқ буюмларни улоқтирганди.
Аввалроқ улоқтирилган жисмлар туфайли бир нафар ўзбекистонлик фотосуратчи ва бир нафар хорижлик оператор жароҳат олгани хабар берилганди.
Темур Кападзе шогирдларининг Японияга қарши ярим финал баҳси 15 июнь куни соат 21:00 да бошланади.
Изоҳ (0)