Жаҳон соғлиқни сақлаш ташкилоти (ЖССТ) бутун дунё мутахассислари билан бирга маймунчечак вируси (monkey pox), унинг тармоқлари ва у келтириб чиқарадиган касалликнинг номини ўзгартириш устида ишламоқда. Бу ҳақда ЖССТ бош директори Тедрос Адханом Гебрейесус матбуот анжуманида маълум қилди.
ЖССТ аниқлик киритишича, касалликнинг номи ташкилот тавсияларига мос келмайди, тавсияларга кўра, номлашда ҳудудлар ва ҳайвонлар номини ишлатмаган яхшироқ.
Касалликларни номлашда ҳар қандай «маданий, ижтимоий, миллий, минтақавий, касбий ёки этник гуруҳлар»ни ранжитиш эҳтимолидан қочиши керак, дея таъкидлади ташкилот вакили.
Аввалроқ бир гуруҳ олимлар маймунчечак касаллигининг номини ўзгартириш талаби билан чиққанди. Улар буни «дискриминация» ва ушбу вирус Африка билан боғлиқ деган қарашларга «ёрлиқ ёпиштириш» деб атаган. Уларнинг айтишича, ортиб бораётган далиллар тўплами вирус узоқ вақт давомида одамдан одамга сездирмасдан юқиб келаётганини кўрсатмоқда, аммо оммавий ахборот воситалари ҳозирги эпидемияни Африка мамлакатлари билан боғлашга уринишда давом этмоқда. Бундан ташқари, ОАВ Европадаги эпидемия ҳақидаги мақолаларни мунтазам равишда африкалик беморларнинг фотосуратлари билан чоп этмоқда.
Маймунчечакнинг ҳозирги эпидемияси ҳақида маълумот 2022 йил май ойида пайдо бўлган. 8 июнь ҳолатига кўра, маймунчечак одатда кенг тарқалмайдиган 28 мамлакатда, аввало Европа ва Америкада 1285 кишида ушбу касаллик тасдиқланган. Вирус кенг тарқалган Африкада эса йил бошидан буён 1536 та касалланиш ҳолати маълум бўлиб, 72 киши унинг оқибатида вафот этган.
Ўзбекистон Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков 23 май куни Ўзбекистонда маймунчечак қайд этилмагани ҳақида айтиб ўтганди. «Айни пайтда ЖССТ тавсияларидан келиб чиқиб бу инфекциянинг юртимизга кириб келмаслиги учун зарур чораларни кўряпмиз», — деганди у. Кейинроқ у Ўзбекистонга маймунчечак кириб келиши эҳтимоли мавжуд, лекин тарқалиш хавфи жуда пастлигини маълум қилганди.
Изоҳ (0)