Украина ҳукумати мамлакатда қазиб олинган кўмир, мазут ва газни хорижга экспорт қилишни тақиқлади. Бу ҳақдаги қарор Украина бош вазири Денис Шмигал томонидан имзоланган ва ҳужжат матни ҳукумат порталига жойлаштирилган.
«Украина Вазирлар Маҳкамасининг 2021 йил 29 декабрдаги ‘2022 йил учун квоталар, экспорт ва импорти лицензиялашни талаб қиладиган товарлар рўйхатини тасдиқлаш тўғрисида’ 1424-сон қарорнинг 1-иловасига ўзгартиришлар киритилсин», — дейилган ҳужжатда.
Янги қарорда 2022 йилда экспорт қилиш рухсат этилган товарлар квотаси келтирилган. Газ, кўмир ҳамда мазут учун квота миқдори 0 куб метр ва 0 тоннани ташкил қилиши иловада қайд этилган.
Ҳужжат 10 июнь куни бош вазир томонидан имзоланган ва шу санадан бошлаб кучга кирган.
Украина президенти Владимир Зеленский 8 июнда кўмир ва газ экспортига вақтинча чекловлар ўрнатилишини эълон қилганди. Зеленский мазкур тақиқлар янги иситиш мавсумига тайёргарлик сифатида амалга оширилаётганини билдирган. Украина давлат раҳбарининг сўзларига кўра, қазиб олинган энергия ресурсларининг ҳаммаси ички эҳтиёжларни қоплашга сарф қилинади. Зеленский келаётган қиш мавсуми мустақиллик йилларидаги энг оғир давр бўлиши ҳақида гапирган.
Украина Энергетика вазирлиги 3 мартдаёқ бозор иштирокчиларига табиий газни экспорт қилишни тақиқлаб қўйганди.
«Бу ерости газ қувурларидаги божхона сақлови тартибига олинган захираларга ҳам тааллуқли», — дея вазият юзасидан тушунтириш берган «Укртрансгаз» оператор-компанияси. Оператор чекловлар Украина ҳудудида давом этаётган уруш туфайли жорий қилинганини қайд этган.
Кейинчалик июнь бошида «Нафтогаз Украина» раҳбари Юрий Витренко Bloomberg нашрига берган интервьюсида Украина ички эҳтиёжларини қондириши учун 8 миллиард доллар қийматидаги газ импорт қилиши зарурлиги ҳақида гапирган. Унинг сўзларига кўра, Киев ушбу масалани Вашингтон билан муҳокама қилган. Украина ҳукумати АҚШдан аввал Европа газ қувуридан олинган газ ўрнига сиқилган табиий газ учун молиявий кўмак олишни кўзлаган.
Изоҳ (0)