Ukraina hukumati mamlakatda qazib olingan ko‘mir, mazut va gazni xorijga eksport qilishni taqiqladi. Bu haqdagi qaror Ukraina bosh vaziri Denis Shmigal tomonidan imzolangan va hujjat matni hukumat portaliga joylashtirilgan.
“Ukraina Vazirlar Mahkamasining 2021-yil 29-dekabrdagi ‘2022-yil uchun kvotalar, eksport va importi litsenziyalashni talab qiladigan tovarlar ro‘yxatini tasdiqlash to‘g‘risida’ 1424-son qarorning 1-ilovasiga o‘zgartirishlar kiritilsin”, — deyilgan hujjatda.
Yangi qarorda 2022-yilda eksport qilish ruxsat etilgan tovarlar kvotasi keltirilgan. Gaz, ko‘mir hamda mazut uchun kvota miqdori 0 kub metr va 0 tonnani tashkil qilishi ilovada qayd etilgan.
Hujjat 10-iyun kuni bosh vazir tomonidan imzolangan va shu sanadan boshlab kuchga kirgan.
Ukraina prezidenti Vladimir Zelenskiy 8-iyunda ko‘mir va gaz eksportiga vaqtincha cheklovlar o‘rnatilishini e’lon qilgandi. Zelenskiy mazkur taqiqlar yangi isitish mavsumiga tayyorgarlik sifatida amalga oshirilayotganini bildirgan. Ukraina davlat rahbarining so‘zlariga ko‘ra, qazib olingan energiya resurslarining hammasi ichki ehtiyojlarni qoplashga sarf qilinadi. Zelenskiy kelayotgan qish mavsumi mustaqillik yillaridagi eng og‘ir davr bo‘lishi haqida gapirgan.
Ukraina Energetika vazirligi 3-martdayoq bozor ishtirokchilariga tabiiy gazni eksport qilishni taqiqlab qo‘ygandi.
“Bu yerosti gaz quvurlaridagi bojxona saqlovi tartibiga olingan zaxiralarga ham taalluqli”, — deya vaziyat yuzasidan tushuntirish bergan “Ukrtransgaz” operator-kompaniyasi. Operator cheklovlar Ukraina hududida davom etayotgan urush tufayli joriy qilinganini qayd etgan.
Keyinchalik iyun boshida “Naftogaz Ukraina” rahbari Yuriy Vitrenko Bloomberg nashriga bergan intervyusida Ukraina ichki ehtiyojlarini qondirishi uchun 8 milliard dollar qiymatidagi gaz import qilishi zarurligi haqida gapirgan. Uning so‘zlariga ko‘ra, Kiyev ushbu masalani Vashington bilan muhokama qilgan. Ukraina hukumati AQSHdan avval Yevropa gaz quvuridan olingan gaz o‘rniga siqilgan tabiiy gaz uchun moliyaviy ko‘mak olishni ko‘zlagan.
Izoh (0)