Қирғизистон билан чегарадаги отишмада тожикистонлик ҳарбий ҳалок бўлгани хабар берилди. Тожикистон Ворух анклавидан ўз фуқароларини эвакуация қилмоқда

Тожик-қирғиз чегарасида юз берган навбатдаги отишма оқибатида тожикистонлик муддатли ҳарбий хизматчи ҳалок бўлди, деб хабар бермоқда «Азия-Плюс».

Нашр қайд этишича, бугун, 14 июнь куни эрталаб Исфара шаҳрининг Ворус жамоати марказидан 10 км масофада жойлашган Кўҳ қишлоғида Тожикистон ва Қирғизистон чегарачилари ўртасида отишма бошланган.

«Отишма давом этмоқда,… қурбон бор — муддатли аскар. Ҳозирда касалхона ярадорларни қабул қилишга тайёрланмоқда», — дейилади хабарда.

Тожикистон расмий ҳукумати ҳодиса юзасидан изоҳ берганича йўқ.

Қирғизистонинг Боткен вилояти маъмурияти «Интерфакс»га маълум қилишича, Тожикистон ҳукумати Қирғизистондаги Ворух анклавидан ўз фуқароларини эвакуация қилишни бошлаган.

«Тахминан 9:25 да (Тошкент вақти билан 8:25) Ворухдан Тожикистон фуқароларини эвакуация қилиш бошланди», — деди вилоят маъмурияти вакили.

Унинг сўзларига кўра, Тожикистон томони отишмадан кейин Боткен туманидаги Самаркандек, Чон-Талаа, Кўктош қишлоқларида чегара қисмларини кучайтиришни бошлаган.

Эслатиб ўтамиз, бугун, 14 июнь куни эрталаб Қирғизистон ва Тожикистон чегарасида отишма юз берди, Тожикистон томони гранатомёт ва миномётларни қўллади. Чегаранинг қирғиз-тожик қисмидаги вазият кескин деб тавсифланди.

Қирғизистон ва Тожикистон чегараси вақти-вақти билан икки мамлакат маҳаллий аҳолиси ва чегарачилари ўртасидаги низолар ҳудудига айланиб туради. Бунга сабаб делимитация қилинмаган ерлар бўлиб, у ерларда давлатлар ўртасидаги чегара қаердан ўтишини аниқлаб бўлмайди.