Оқ уй матбуот котиби Карин Жан-Пьер президент Жо Байден 2024 йилда иккинчи муддатга номзодини қўйишни режалаштираётганини тасдиқлади, деб ёзади «Коммерсантъ». Шунингдек, у 79 ёшли Байденга саломатлиги билан боғлиқ муаммолар халал бериши мумкин, деган фикрга қўшилмади.
Брифинг чоғида матбуот котиби президентни »қувиб етиб бўлмаслиги»ни айтди. «У бажараётган ишларга қаранг, у нима қилаётганига, Америка жамоатчилиги учун қандай ишлаётганига қаранг», — деди у.
У The New York Times газетаси мақоласида келтирилган, Жо Байденнинг ёши унинг қайта сайланиши учун «жиддий муаммо»га айланиши мумкинлиги (ўша пайтда у 81 ёшда бўлади) ҳақидаги версияни рад этди. «Бизни бу нарса эмас, биз Америка халқига қандай ёрдам бера олишимиз қизиқтиради. Биз уларнинг ҳаётини қандай яхшиламоқчимиз? Президент шу ҳақда гапирмоқда. У шунга ўз эътиборини қаратган ва қаратишда даавом этади», — деди Жан-Пьер.
«Фақат шуни айтишим мумкинки, президент 2024 йилдаги сайловга ўз номзодини қўйишни режалаштираётгани ҳақида бир неча марта айтган ва шунда тўхтаймиз», — дея қўшимча қилди матбуот котиби.
Нашр эслатишича, июнда Жо Байденнинг рейтинги тарихий минимумни янгилаб, 36 фоизгача тушиб кетди. Бу, ҳатто, Дональд Трампнинг рейтингидан ҳам пастроқ кўрсаткичдир, уни эса Оқ уйнинг жорий раҳбари «тарихдаги энг ёмон президент» деб атайди.
Байденнинг фаолиятини қўллаб-қувватлаш кўрсаткичлари пасайишига, хусусан, бензин нархининг ошиши сабаб бўлмоқда: Байден президентлиги даврида у икки карра қимматлашиб, инфляцияни тезлаштириб юборди. АҚШда, шунингдек, болалар овқати етишмовчилиги муаммоси юзага келди ҳамда қурол айланмаси устидан назоратнинг кучайтирилиши юзасидан баҳслар кескинлашди.
Изоҳ (0)