14 июнь куни Олий Мажлис Қонунчилик палатасидаги Ўзбекистон «Миллий тикланиш» демократик партияси фракциясининг навбатдаги йиғилиши бўлиб ўтди. Унда депутатлар дастлаб «Ўзбекистон Республикаси Маъмурий жавобгарлик тўғрисидаги кодексининг 206-1-моддасига ўзгартиш киритиш ҳақида»ги қонун лойиҳасини биринчи ўқишда муҳокама қилди. Бу ҳақда Қуйи палата матбуот хизмати хабар берди.
Таъкидланишича, тазйиқ ва зўравонликдан жабрлаган хотин-қизларга давлат ҳимоясини тақдим этувчи, уларга тазйиқ ўтказаётган ёки зўравонлик содир этаётган шахсларга нисбатан таъсир ўтказиш чоралари қўлланишига сабаб бўладиган ҳимоя ордери берилишига қарамасдан, бундай ҳолатлар сони камаймаяпти.
Мисол учун, 2020 йилда хотин-қизларга 14 774 та ҳимоя ордери берилган бўлса, 2021 йилда бу кўрсаткич 39 343 тани ташкил этган. Ҳимоя ордери талабларини бажармаслик бўйича эса 1 210 та ҳолат аниқланган.
Қонун лойиҳасида хотин-қизларга нисбатан тазйиқ ва зўравонлик ўтказилишининг олдини олиш ва уларнинг ҳуқуқларини ҳимоя қилиш мақсадида Маъмурий жавобгарлик тўғрисидаги кодекснинг 206-1-моддаси санкциясида белгиланган жарима миқдорининг оширилиши назарда тутилмоқда. Ҳозирда ушбу моддада назарда тутилган жавобгарлик бўйича айбдор БҲМнинг 3 бараваригача (900 минг сўмгача) жаримага тортилади.
Фракция аъзоси Алишер Ҳамроев қонун лойиҳасига муносабат билдириб, жаримани ошириш билан бундай ҳолатларни камайтириб бўлмаслигини таъкидлаган. Унинг айтишича, жаримадан бутун оила бюджети зарар кўради ва бу оилавий муҳитни баттар издан чиқаради. Шунинг учун аёлига қўл кўтарадиган эркакларни жазолашнинг бошқа йўлини топиш керак.
Қизғин муҳокамалардан сўнг фракция аъзолари қонун лойиҳасини концептуал жиҳатдан маъқуллаган.
«Қадриятларимизда бу муаммога ечим бор. Оилада эркакнинг ҳам, аёлнинг ҳам масъулияти бор. Эр-хотин оилада бир-бирини ҳурмат қилса, ҳимоя ордерига зарурат ҳам қолмайди. Жазолаш билан оилани сақлаб қолиб бўлмайди», — дейди фракция раҳбари Алишер Қодиров.
Унга кўра, ҳимоя ордери талабларини бажармаслик учун белгиланган базавий ҳисоблаш миқдорининг бир бараваридан уч бараваригача миқдордаги жаримани – беш бараваридан ўн бараваригача этиб белгилаш таклиф қилинмоқда.
Олий Мажлис Қонунчилик палатаси девони масъул ходими Беҳзод Султоновга кўра, ҳимоя ордери талабларини бажармаслик учун белгиланган жаримани – беш баравардан ўн бараваригача (3 миллион сўмгача) этиб белгилаш таклиф қилинмоқда.
Эслатиб ўтамиз, 2020 йилда хотин-қизларни тазйиқ ва зўравонликдан ҳимоя қилиш бўйича президент қарори қабул қилинган. Ҳужжатга асосан, тазйиқ ва зўравонликдан жабрланган аёлларга ҳимоя ордери бериш тартиби тасдиқланган. Шунингдек, хотин-қизларга гап отганларни жавобгарликка тортиш таклиф қилинган эди
Изоҳ (0)