Қашқадарё вилояти ҳокимига янги ўринбосар тайинланди. Бу ҳақда вилоят ҳокимлиги ахборот хизмати хабар берди.
Маълум бўлишича, Китоб туманининг собиқ ҳокими Алишер Зокиров вилоят ҳокимининг туризм, маданият, маданий мерос ва оммавий коммуникациялар масалалари бўйича ўринбосари — вилоят туризм ва маданий мерос бош бошқармаси бошлиғи сифатида иш бошлаган.
Алишер Зокиров 1976 йилда туғилган бўлиб, Жаҳон иқтисодиёти ва дипломатия университетини, Тошкент давлат иқтисодиёт университети ва Ўзбекистон Республикаси Президенти ҳузуридаги Давлат ва жамият қурилиши академиясини тамомлаган.
Вилоят ҳокимлиги ахборот хизмати раҳбари Аҳрор Содиқовнинг «Дарё»га қўшимча қилишича, 2021 йил апрель ойидан бери Қашқадарё ҳокимининг туризм, маданият, маданий мерос ва оммавий коммуникациялар масалалари бўйича ўринбосари — вилоят туризм ва маданий мерос бош бошқармаси бошлиғи сифатида ишлаб келган Азамат Авазов соғлиғидаги муаммолар сабаб ўз хоҳишига кўра ишдан бўшаш ҳақида ариза ёзган.
Аввалроқ Китоб туманига Ўктам Пардаев ҳоким этиб тайинлангани маълум қилинганди.
Изоҳ (0)