АОКАнинг «Пахтакор» стадионида журналист ИИБ ходими томонидан калтаклангани юзасидан юборган сўрови ўрганилмоқда — Бош прокуратура

Тошкент шаҳридаги «Пахтакор» стадионида 11 июнь куни футбол бўйича U-23 Осиё кубоги чорак финали доирасида Ўзбекистон—Ироқ ўйинини ёритишга борган «Севимли» телеканали мухбири ва тасвирчисига Ички ишлар органлари ва Миллий гвардия ходимлари томонидан куч ишлатилгани, камераси тортиб олингани ҳақида хабар берилганди. Бош прокуратура ҳолат юзасидан Ахборот ва оммавий коммуникациялар агентлиги юборган сўровни ўрганиб чиқаётганини маълум қилди.

Маълумки, Ўзбекистон Республикасининг «Журналистлик фаолиятини ҳимоя қилиш тўғрисида»ги Қонунининг 10-моддасида давлат журналистга ахборотни эркин олишини ва тарқатишини кафолатлаши, ўз касбига доир фаолиятни амалга оширишда унинг ҳимоя қилинишини таъминлаши лозимлиги, 14-моддада эса журналистнинг ушбу ҳуқуқларини бузганлик, унинг ҳаёти, соғлиғи ва мол-мулкига таҳдид, зўравонлик ёки тажовуз қилганлик қонун ҳужжатларига мувофиқ жавобгарликка сабаб бўлиши белгиланган.

Прокуратура томонидан ушбу юзага келган ҳолат ваколат доирасида ўрганиб чиқилади ва иштирокчилар ҳаракатларига ҳуқуқий баҳо берилади. Қонунбузилиши ҳолатлари аниқланган тақдирда, айбдорларга қонун доирасида чоралар кўрилиши таъминланади, — дейилади Бош прокуратура муносабатида.

11 июнь куни Тошкент шаҳридаги «Пахтакор» стадионида футбол бўйича U-23 Осиё кубоги чорак финали доирасида Ўзбекистон—Ироқ ўйинини ёритишга борган «Севимли» телеканали мухбири ва тасвирчисига Ички ишлар органлари ва Миллий гвардия ходимлари томонидан куч ишлатилгани, камераси тортиб олингани ҳақида хабар тарқалган. АОКА мазкур ҳолатга муносабат билдириб, журналистларининг калтаклангани юзасидан Бош прокуратура, Миллий гвардия ва ИИВга сўров юборган.

ИИВ матбуот котиби Шоҳрух Ғиёсовнинг маълум қилишича, телеканал журналистлари стадионга киришда жанжал уюштирган фуқаролар орасида бўлган ва оператор ўша ерда жароҳатланган.

Андижон шаҳридаги «Янги бозор» савдо мажмуасида эса одамларга навбат билан арзонлаштирилган шакар сотиш жараёнини тасвирга олишга уринган журналистнинг телефони тортиб олинган. «Бир қанча уринишлардан сўнг ҳам смартфон қайтариб берилмаяпти. Ягона шарти – куч ишлатиш йўли билан олинган ва ИИБ ходимининг куч ишлатгани ҳамда телефонни тортиб олгани суратга олинган видеони ўчириб юбориш экан», — дейилади хабарда.

Шоҳрух Ғиёсовга кўра, мухбир одамларнинг навбатини ва ўзаро гап талашаётганини тасвирга олиш вақтида, фуқаролар томонидан уларнинг юзларини тасвирга олишига эътироз билдирилган. Шундан сўнг, ИИБ ходими журналистдан уларнинг ҳуқуқларини поймол қилмасдан тасвирни ўчириб ташлаш талаб қилинган.