Шимолий Корея етакчиси Ким Чен Ин Россия президенти Владимир Путинни Россия куни билан табриклади ва Шимолий Корея халқи номидан Россия халқини тўлиқ қўллаб-қувватлашини билдирди, деб хабар бермоқда Корея марказий телеграф агентлиги ҳужжат нусхасига таяниб.
«Сизнинг раҳбарлигингиз остида Россия халқи синов ва қийинчиликларни мардонавор енгиб, биз ҳар томонлама қўллаб-қувватлайдиган мамлакат(Россия)нинг қадр-қиммати, хавфсизлиги ва ҳуқуқларини ҳимоя қилиш йўлида адолатли ишларни амалга оширишда улкан муваффақиятларга эришмоқда», —дейилади телеграммада.
Унинг қўшимча қилишича, КХДР ҳукумати «кўп йиллик тарих, дўстлик ва яхши қўшничилик анъаналарига» эга бўлган Корея—Россия муносабатларини қадрлайди ҳамда уларни «янги давр тақозоси ва икки мамлакат халқларининг орзу-интилишларига мувофиқ равишда кенгайтириш ва ривожлантириш» ниятида.
КХДР раҳбари, шунингдек, Россия халқига фаровонлик тилади.
Россия куни мамлакатда анъанавий тарзда 12 июнь куни нишонланади, байрам 1990 йилда Россия совет федератив социалистик республикаси давлат суверенитети тўғрисидаги декларация қабул қилинган санага тўғри келади.
Путин ва Ким Чен Ин 2019 йилда Владивостокда Шимолий Корея етакчиси Россияга зирҳли поездда келганида шахсан учрашган эди. Давлат раҳбарларининг музокара мавзуларидан бири Корея ярим оролининг ядровий муаммоси бўлган.
Изоҳ (0)