Андижонда Lacetti орқа балони ёрилиб кетиши оқибатида бошқарувни йўқотиб, велосипедда йўлни кесиб ўтаётган фуқарони уриб юборди. Оқибатда иккаласи ҳам каналга тушиб кетган, велосипедчи сувда чўкиб вафот этган. Бу ҳақда «Дарё» мухбири хабар бермоқда.
Маълум бўлишича, йўл транспорт ҳодисаси 2022 йилнинг 29 май куни соат 22:55 ларда Хўжаобод тумани, Ипакчи маҳалласи ҳудудидан ўтувчи ички йўл ўрамидан оқиб ўтган Жанубий Фарғона канали бўйида содир бўлган. Ўрганишлар давомида Булоқбоши тумани Сарвонтепа туманида яшовчи, 2003 йилда туғилган М.I. ҳеч қандай ҳайдовчилик ҳуқуқига эга бўлмасдан Lacetti русумли автомашинани бошқариб кетаётган вақтда транспортнинг орқа балони ёрилиб кетиши оқибатида бошқарувни йўқотиб, ўзи билан бир йўналишда велосипедда ҳаракатланиб келаётган С.А.ни уриб юборган.
Оқибатда велосипедчи ҳамда ҳайдовчи автомашина билан бирга каналга тушиб кетган. Ҳайдовчи сувдан чиқиб олган бўлса-да, велосипедчи сувда оқиб кетган.
Шундан сўнг фавқулодда вазиятлар бўлими ходимлари томонидан фуқарони қидириб топиш чоралари кўрилди. Бир неча кун мобайнидаги қидирув ишларидан сўнг фуқаронинг жасади сувдан топилган.
Ҳолат юзасидан терговга қадар текширув ҳаракатлари олиб борилмоқда.
Изоҳ (0)