Toshkent viloyatining O‘rta Chirchiq tumanida 25 yoshli fuqaro poyezd urib ketishi oqibatida halok bo‘ldi. Bu haqda “Milliy” telekanalining “Millar” dasturida ma’lum qilindi.
Ma’lum qilinishicha, 7-iyun kuni IIV TXTBBga Termiz—Andijon yo‘nalishi bo‘yicha harakatlanayotgan yo‘lovchi poyezdi odam urib yuborgani to‘g‘risida xabar kelib tushgan.
Guvohlarning so‘zlariga ko‘ra, marhum ertalab dalaga ishlashga ketayotgan vaqtida o‘z hayotini xavf ostiga qo‘yib, poyezd yo‘lini kesib o‘tmoqchi bo‘lgan. Aniqlanishicha, marhumning tug‘ma ko‘rish va eshitish qobiliyatida nuqsoni bo‘lgani sabab poyezd tovushini eshitmay qolgan.
Shuningdek, 7-iyun Toshkent viloyati Chirchiq shahri “Mir Alisher” MFYda hududidan o‘tuvchi poyezd yo‘lida ham baxtsiz hodisa sodir bo‘lgan. Ertalabki soat 09:30 larda “elektrovoz” temiryo‘l kesishmasidan velosipedda o‘tayotgan 20 yoshli fuqaroni urib yuborgan. Oqibatda yigit 15-20 metr masofaga uchib tushgan va voqea joyida vafot etgan.
Aniqlanishicha, marhum bu vaqtda qo‘l telefonidan foydalanib, temiryo‘l kesishmasidan o‘tmoqchi bo‘lgan.
Avvalroq Jizzaxda poyezd temiryo‘lda quloqchin taqib ketayotgan fuqaro sabab favqulodda to‘xtagani, Toshkent—Xo‘jakent poyezd yo‘lida uxlab qolgan mast fuqaroning hayoti saqlab qolingani to‘g‘risida xabar berilgandi.
Izoh (0)