Барча фасл ўз ҳусн-таровати, бир-бирини такрорламаслиги билан гўзалдир. Болаликнинг сеҳрли оламида яшаётган, ҳаёт ташвишларидан узоқда, ўзининг мўъжизакор дунёсида болалик гаштини сураётган самимий ва қувноқ болажонлар учун ёз фаслининг гашти ўзгача. Ёзги таътил давомида болаларнинг янгича билим ва кўникмаларни эгаллаши, янги дўстлар орттириши, мароқли дам олишини ташкиллаштириш мақсадида «Ўзбекнефтгаз» АЖ томонидан бир қатор ишлар амалга оширилиб келинмоқда.
«Ўзбекнефтгаз» АЖ бошқаруви ва Ўзбекистон энергетика, нефть-газ ва геология ходимлари касаба уюшмаси Республика кенгаши ижроия қўмитасининг 2022 йил 12 апрелдаги «‘Ўзбекнефтгаз’ АЖ тизимидаги бошқарма ва корхоналар тасарруфидаги болалар соғломлаштириш оромгоҳларини 2022 йил ёзги мавсумга тайёрлаш, дам олдириш ва мавсумни юқори савияда ўтказиш тўғрисида»ги қўшма қарорига асосан, жамият тасарруфидаги болалар соғломлаштириш оромгоҳларида ёзги мавсум давомида болалар саломатлигини мустаҳкамлаши учун барча шарт-шароитлар яратилиши, маданий-маърифий ва спорт тадбирларининг мунтазам ўтказилиши ҳамда болалар мароқли дам олишининг ташкил этилиши белгиланган.
Жорий йил ёзги мавсум давомида жамият тасарруфидаги болалар соғломлаштириш оромгоҳларида 10 мингга яқин болаларнинг дам олиши режалаштирилган бўлиб, ҳозирда биринчи сменага 2245 нафар бола қабул қилинди.
Жумладан:
- Муборак нефть ва газ қазиб чиқариш бошқармасига қарашли «Ёш алангачи» номли болалар соғломлаштириш оромгоҳига 503 нафар;
- Муборак газни қайта ишлаш заводига қарашли «Ниҳол» номли болалар соғломлаштириш оромгоҳига 401 нафар;
- Шўртан нефть ва газ қазиб чиқариш бошқармасига қарашли «Беруний» номли болалар соғломлаштириш оромгоҳига 226 нафар;
- Шўртан газ кимё мажмуасига қарашли «Лочин» номли болалар соғломлаштириш оромгоҳига 902 нафар;
- Бухоро нефтни қайта ишлаш заводига қарашли «Нефтчи» номли болалар соғломлаштириш оромгоҳига 213 нафар бола қабул қилинган.
Шу билан бирга жорий йилнинг 14 июнь кунидан «Ўзбекнефтгаз» АЖ марказий аппарати ва Устюрт газ қазиб чиқариш бошқармаси ходимларининг 260 нафар фарзандлари Ўзбекистон касаба уюшмалари федерациясига қарашли «Қуёшли» номли болалар соғломлаштириш оромгоҳида дам олиши режалаштирилган.
Барча оромгоҳларда санитария-гигиена ҳамда хавфсизлик талабларига тўлиқ жавоб берилиши ва қулай шароитда болаларнинг белгиланган кундалик ҳаёт тарзига риоя этилиши, сифатли овқатланиши, ижодий салоҳиятининг ривожланиши, соғлом турмуш тарзи кўникмаларининг шаклланиши, мароқли дам олиши, саломатлигини тиклаши ва мустаҳкамлаши, жисмоний тарбия, спорт ва туризм билан шуғулланиши учун тўлиқ шароитлар яратилган.
Оромгоҳларга сифатли озиқ-овқат маҳсулотлари ва дори-дармонларни узлуксиз етказиб бериш, малакали кадрларни жалб этиш ва дам олиш масканларининг моддий-техник базасини мустаҳкамлаш ҳамда ижтимоий ҳимояга муҳтож, кам таъминланган, боқувчисини йўқотган оилалар фарзандларини, меҳрибонлик уйлари тарбияланувчиларини имтиёзли равишда дам олдириб, уларни моддий ва маънавий қўллаб-қувватлаш масалаларига катта эътибор қаратилмоқда.
Бундан ташқари оромгоҳларнинг тинчлик ва осойишталигини, хавфсизлигини таъминлаш мақсадида, Ички ишлар бошқармалари, Миллий гвардия, Ёнғин хавфсизлиги бошқармалари, Фавқулодда вазиятлар бошқармалари, тиббиёт ходимларидан малакали мутахассислар хизмат кўрсатмоқда.
«Ўзбекнефтгаз» АЖ матбуот хизмати
Изоҳ (0)