«Аквамен» фильмининг иккинчи қисми — «Аквамен ва йўқолган қироллик»дан Эмбер Хёрд ижросидаги Меру суперқаҳрамони иштирок этган барча саҳналар кесиб ташланиши мумкин. Бу ҳақда инсайдер KC Walsh ижтимоий тармоқлар орқали маълум қилди.
Унинг сўзларига кўра, сценарийнавислар қаҳрамоннинг йўқолиб қолганини фильм бошида туғуруқ сабаб вафот этган дея изоҳлашлари кутилмоқда. Суратга олиш ишлари 2022 йил бошларида якунланганига қарамай, картина премьераси 2023 йил мартига мўлжаллангани сабаб лойиҳа муаллифлари керакли саҳналарни қайта суратга олиши мумкин. Хёрд қаҳрамонининг кетиши борасидаги якуний қарор картинанинг синов намойишидан кейин аниқ бўлади.
The Direct’нинг ёзишича, Warner Bros. Эмбер Хёрд иштирокидаги саҳналардан воз кечиш бўйича қарор қабул қилган бўлиши мумкин, чунки унинг лойиҳадаги иштироки фильм даромадига салбий таъсир кўрсатади. Студиядагилар бу каби хулосага актрисанинг собиқ турмуш ўртоғи Жонни Депп билан суд жараёнларидан сўнг келган. Деппни нафақат суд, балки ижтимоий тармоқларнинг аксар қисми қўллаб-қувватлаган.
2018 йилда катта экранларга чиққан «Аквамен»нинг биринчи қисмида Эмбер Хёрд кадрда бошқа актёрлардан кўра кўпроқ кўриниш берган. Бироқ Депп билан судлашув жараёнида актриса картинанинг иккинчи қисмидаги роли қисқартирилганини тан олган.
Голливуд юлдузлари Жонни Депп ва Эмбер Хёрд ўртасидаги можаро анчадан буён барчага маълум. Аёл собиқ эрини оиладаги зўравонликда айблаган. Бу ҳақда Хёрд 2018 йилда The Washington Post’га берган интервьюсида маълум қилган. Ўтган ҳафта актёр туҳмат учун 50 миллион доллар талаб қилиб, судга шикоят аризаси киритган — суд эса унга 15 миллион тўланиши бўйича қарор чиқарди.
Изоҳ (0)