Сурхондарё вилояти ҳокими Тўра Боболов бугунги кунда фаолият юритаётган ҳокимларни уч тоифага ажратишини айтди. Бу ҳақда у «Дарё» билан суҳбатда гапирган.
«Иш тажрибамдан келиб чиқиб, ҳокимларни уч тоифага ажратаман. Биринчиси боқиманда ҳокимлар бўлиб, улар фақат давлат қилиб бериши керак дея елкасидаги барча масъулиятни давлатга юклайди. Иккинчи тоифа ҳокимлар эса, маълум маънода давлатга суянади. Тўғри, ўзида ҳам ҳаракат бўлади. Аммо кам миқдорда. Учинчи тоифа ҳокимлар эса, ёниб турган, ташаббускор ҳокимлар. Уларга йўналиш берилса бас, ўзи маблағ топади, тадбиркор ва инвестор жалб қилади ва фуқароларнинг кўнглини топиб, айтилганидан-да ортиғи билан бажаради. Сурхондарёда ҳар учала тоифадаги ҳокимлар ҳам бор», — дейди Сурхондарё вилояти ҳокими Тўра Боболов.
Сурхондарё ҳокимининг айтишича, вилоятда фаолият юритувчи туман ва шаҳар ҳокимлари фаолиятига сурхондарёликлар етарлича баҳо бермоқда.
«Сурхондарёликлар бир тумандан иккинчи туманга ўтганда ёки шаҳарга келганда қилинаётган ишларни кўриб ҳокимлар фаолиятига баҳо бериб бормоқда. Туман ва қишлоқларда бўлаётган ўзгаришларни кузатиб, ҳокимлар қандай ишлаётганини билишингиз мумкин», — дейди вилоят ҳокими.
Тўра Боболовнинг айтишича, тадбиркорни қўллаб-қувватлаган, унинг муаммосига эътиборсиз бўлмаган ҳоким бугунги куннинг энг яхши раҳбари ҳисобланади.
«Пандемия даврида бизни ва халқимизни қўллаб-қувватлаган, ёнимизда турган ким бўлди? Албатта, тадбиркорлар. Уларнинг ёрдами билан қийин вазиятдан ҳам чиқдик ва яна давом этяпмиз. Шунинг учун тадбиркорни қўллаган ва унинг муаммосига эътиборсиз бўлмаган раҳбар ҳудудини ривожлантиради», — дейди Тўра Боболов.
Сурхондарё ҳокими Ангор, Шеробод, Музработ, Шўрчи ва Денов тумани ҳокимларини ҳудуддаги бошқа ҳокимларга намуна сифатида кўрсатишини айтди.
«Хизмат кўрсатиш бўйича Ангор туманида жуда катта ўзгаришлар бор. Ўтган бир йил ичида туманда 986 та хизмат кўрсатиш объекти ишга тушди. Ҳоким тадбиркорни қўллаб-қувватлаяпти. Фуқароларга тўғри тушунтиряпти. Бу ерда жуда катта иш бор. Қумқўрғон тумани ҳокими ҳам ташаббускор ва тадбиркорларни қўллаб-қувватлови ҳоким. Шунингдек, Шеробод, Музработ ва Шўрчи туманларида ҳам катта ўзгаришлар бор. Денов тумани эса Янги Ўзбекистоннинг янги Деновига айланди», — деди вилоят ҳокими.
Тўра Боболовнинг тан олишича, вилоятда боқиманда ҳокимлар ҳам бор.
«Бизда ишлолмаётган, боқиманда ҳокимларга дакки берилмайди, сурхондарёчасига бошқача қилиб тушунтирилади. Шундан сўнг, ҳаммаси жонланади. Билмаётганига, ишлашни хоҳламаётганига шундай қилиб тушунтириб, уларни уйғотамиз», — дейди вилоят раҳбари.
Сурхондарё ҳокими вилоят пойтахтдан 700 километр узоқликдаги ҳудудлиги боис ҳам узоқ йиллар давомида эътибордан четда қолганини, кейинги олти йил давомида қилинган ишлар вилоятнинг ривожланишига туртки берганини айтмоқда.
«Вилоят аввал фақат қишлоқ хўжалиги, хусусан пахта ва ғаллачилик билан шуғулланиб келган. Энди пахтанинг ҳам ғалланинг ҳам ўз эгаси бор. Энди саноатлашган, экспортлар ишонган вилоятга айланяпмиз», — дейди Тўра Боболов.
Изоҳ (0)