2022 йилнинг 1 апрель ҳолатига кўра Ўзбекистонда мобил радиотелефон абонентлари сони 29,9 миллион нафарни ташкил этган. Бу ҳақда Давлат статистика қўмитаси хабар берди.
Таъкидланишича, ушбу кўрсаткич ўтган йилнинг мос даврига нисбатан солиштирилганда 11 фоизга ошган. 2021 йилнинг апрелида Ўзбекистонда мобил алоқа тизимига уланган абонентлар 26,9 миллионтани ташкил этгани тўғрисида хабар берилганди.
Расмий маълумотларга кўра, 1 апрель ҳолати бўйича Ўзбекистон аҳолиси 35,43 миллион кишини ташкил қилган. Шундай қилиб, ҳар 100 кишига 84,4 абонент тўғри келади (шу жумладан корпоратив обуначилар, улар ҳақида маълумот берилмаган).
«Gazeta.uz»нинг қўмитага таяниб ёзишича, энг кўп уяли алоқа фойдаланувчилари пойтахтда рўйхатга олинган — 6,67 миллион киши ёки умумий абонентларнинг 22,3 фоизи (гарчи пойтахт аҳолисининг расмий сони 3 миллионга етмаган бўлса ҳам). Кейинги ўринларда 3,09 миллион абонент (10 фоиз) билан Фарғона ва 2,84 миллион (9,5 фоиз) абонент билан Самарқанд жойлашган.