Шавкат Мирзиёев ва Эмомали Раҳмон Хива гилам комбинатини бориб кўрди

Шавкат Мирзиёев ва Тожикистон президенти Эмомали Раҳмон Хива гилам комбинатида бўлди. Бу ҳақда Президент матбуот хизмати хабар қилди.

Қайд этилишича, умумий қиймати қарийб 22 миллион доллар бўлган ушбу корхона Самарқанддаги «Сам-Антеп-Гилам» компанияси томонидан 2020 йилда ташкил этилган. Ўтган йили лойиҳанинг иккинчи босқичи ишга туширилган. Комбинатга Германия, Бельгия, Австрия, Швейцария, Италия, Франция ва Туркиядан ускуналар келтириб ўрнатилган. 420 та иш ўрни яратилган.

Бу ерда гилам, полипропилен ип ва бошқа маҳсулотлар ишлаб чиқарилмоқда. Улар АҚШ, Россия, Хитой, Қозоғистон, Қирғизистон, Туркманистон ва Тожикистонга экспорт қилинмоқда.

Бу йил учинчи босқич — акрил толасидан калава тайёрлаш лойиҳаси амалга оширилган. Натижада ишлаб чиқариш қуввати йилига 2,2 миллион квадрат метрга етган. Маҳсулотнинг 45 фоизи чет элга сотилиши, йиллик экспорт 7 миллион доллардан ошиши кутилмоқда.

Президентлар корхонадаги ишлаб чиқариш жараёнини ва шоу-румни кўздан кечирган. Шу ерда Ўзбекистон саноат маҳсулотлари ҳам намойиш этилган. Турдош тармоқлар мутасаддиларига тажриба алмашиш, савдони ривожлантириш бўйича кўрсатмалар берилган.

Эмомали Раҳмоннинг Ўзбекистонга расмий ташрифинининг биринчи куни

Эмомали Раҳмон Ўзбекистон президенти таклифига биноан 2 июнь куни эрталаб йўловчи рейсларини бажарувчи самолётда Тошкентга етиб келди. Тошкент халқаро аэропортида уни Шавкат Мирзиёев кутиб олди. Етакчилар ўртасида қисқа суҳбат бўлиб ўтган. Сўнг Кўксаройда Эмомали Раҳмонни расмий кутиб олиш маросими бўлиб ўтди. Маросимда икки мамлакат расмий делегациялари аъзолари ҳам иштирок этган.

Шундан сўнг давлат раҳбарлари тор доирада учрашув ўтказиб, Марказий Осиёда тинчлик ва барқарорликни таъминлаш масалаларини муҳокама қилди. Музокаралар  икки мамлакат делегациялари иштирокида кенгайтирилган таркибда давом этди.

Музокаралар якунида ҳужжатларни имзолаш ва алмашиш маросими бўлди. Шавкат Мирзиёев ва Эмомали Раҳмон Абадий дўстликни мустаҳкамлаш ва иттифоқчилик тўғрисидаги декларацияни имзолади.

Шунингдек, Зарафшон дарёсида Яван гидроэлектр станцияси қурилишини бошлаш маросими бўлиб ўтди. Шавкат Мирзиёев ва Эмомали Раҳмон рамзий тугмани босиб, қурилишга старт берди. Ҳар икки давлат раҳбарлари  Тошкент шаҳридаги Технопаркка ташриф буюрди.

Ташрифнинг иккинчи куни

Давлат раҳбарлари 3 июнь куни Хоразмга келди. Ташриф чоғида Хоразмдаги саноат корхоналарини бориб кўриш, Хива шаҳрини зиёрат қилиш режалаштирилган. Шавкат Мирзиёев ва Эмомали Раҳмон Урганч шаҳридаги UzXCMG қўшма корхонасига ташриф буюрди.