Shavkat Mirziyoyev va Tojikiston prezidenti Emomali Rahmon Xiva gilam kombinatida bo‘ldi. Bu haqda Prezident matbuot xizmati xabar qildi.
Qayd etilishicha, umumiy qiymati qariyb 22 million dollar bo‘lgan ushbu korxona Samarqanddagi “Sam-Antep-Gilam” kompaniyasi tomonidan 2020-yilda tashkil etilgan. O‘tgan yili loyihaning ikkinchi bosqichi ishga tushirilgan. Kombinatga Germaniya, Belgiya, Avstriya, Shveysariya, Italiya, Fransiya va Turkiyadan uskunalar keltirib o‘rnatilgan. 420 ta ish o‘rni yaratilgan.
Bu yerda gilam, polipropilen ip va boshqa mahsulotlar ishlab chiqarilmoqda. Ular AQSH, Rossiya, Xitoy, Qozog‘iston, Qirg‘iziston, Turkmaniston va Tojikistonga eksport qilinmoqda.
Bu yil uchinchi bosqich — akril tolasidan kalava tayyorlash loyihasi amalga oshirilgan. Natijada ishlab chiqarish quvvati yiliga 2,2 million kvadrat metrga yetgan. Mahsulotning 45 foizi chet elga sotilishi, yillik eksport 7 million dollardan oshishi kutilmoqda.
Prezidentlar korxonadagi ishlab chiqarish jarayonini va shou-rumni ko‘zdan kechirgan. Shu yerda O‘zbekiston sanoat mahsulotlari ham namoyish etilgan. Turdosh tarmoqlar mutasaddilariga tajriba almashish, savdoni rivojlantirish bo‘yicha ko‘rsatmalar berilgan.
Emomali Rahmonning O‘zbekistonga rasmiy tashrifinining birinchi kuni
Emomali Rahmon O‘zbekiston prezidenti taklifiga binoan 2-iyun kuni ertalab yo‘lovchi reyslarini bajaruvchi samolyotda Toshkentga yetib keldi. Toshkent xalqaro aeroportida uni Shavkat Mirziyoyev kutib oldi. Yetakchilar o‘rtasida qisqa suhbat bo‘lib o‘tgan. So‘ng Ko‘ksaroyda Emomali Rahmonni rasmiy kutib olish marosimi bo‘lib o‘tdi. Marosimda ikki mamlakat rasmiy delegatsiyalari a’zolari ham ishtirok etgan.
Shundan so‘ng davlat rahbarlari tor doirada uchrashuv o‘tkazib, Markaziy Osiyoda tinchlik va barqarorlikni ta’minlash masalalarini muhokama qildi. Muzokaralar ikki mamlakat delegatsiyalari ishtirokida kengaytirilgan tarkibda davom etdi.
Muzokaralar yakunida hujjatlarni imzolash va almashish marosimi bo‘ldi. Shavkat Mirziyoyev va Emomali Rahmon Abadiy do‘stlikni mustahkamlash va ittifoqchilik to‘g‘risidagi deklaratsiyani imzoladi.
Shuningdek, Zarafshon daryosida Yavan gidroelektr stansiyasi qurilishini boshlash marosimi bo‘lib o‘tdi. Shavkat Mirziyoyev va Emomali Rahmon ramziy tugmani bosib, qurilishga start berdi. Har ikki davlat rahbarlari Toshkent shahridagi Texnoparkka tashrif buyurdi.
Tashrifning ikkinchi kuni
Davlat rahbarlari 3-iyun kuni Xorazmga keldi. Tashrif chog‘ida Xorazmdagi sanoat korxonalarini borib ko‘rish, Xiva shahrini ziyorat qilish rejalashtirilgan. Shavkat Mirziyoyev va Emomali Rahmon Urganch shahridagi UzXCMG qo‘shma korxonasiga tashrif buyurdi.
Izoh (0)