Американинг Оклахома штати Талса шаҳрида содир этилган отишмада беш киши, шу жумладан, ҳужум қилган шахснинг ўзи ҳам ҳалок бўлди, деб хабар бермоқда «Коммерсантъ» маҳаллий полиция департаментига таяниб. Отишма содир этган шахс, ҳуқуқ-тартибот органлари маълумотларига кўра, 35-40 ёшлардаги қора танли бўлган, у сойли милтиқ (винтовка)дан фойдаланган.
«Ҳужумчининг шахсини аниқлаганимизча йўқ. У 35-40 ёшлардаги қора танли эркак. Воқеа жойида унинг ёнидан винтовка ва тўппонча топилди», — деди полиция вакили Эрик Далглиш брифингда.
Отишма шаҳардаги Авлиё Франциск касалхонаси корпусларидан бирида маҳаллий вақт билан 1 июнь куни 17:00 да (Тошкент вақти билан 2 июнь 03:00) юз берди.
Яна бир неча киши жабрланган, аммо полиция уларнинг аниқ сонини маълум қилганича йўқ.
Талса полицияси капитани Ричард Меленберг сўзларига кўра, бир киши тиббий ёрдам олишга уриниб, воқеа жойини тарк этганидан кейин вафот этган.
Оқ уй вакили маълум қилишича, президент Жо Байден давлат ва маҳаллий амалдорларга ёрдам таклиф этган.
Бундан бир ҳафтача аввал, 24 май куни Техаснинг Ювалд шаҳридаги бошланғич мактабда отишма содир этилиб, 22 киши, шу жумладан, ўқотарнинг ўзи ҳам ҳалок бўлганди. Кейинроқ 30 май куни Оклахома штати Тафт шаҳрида ўтказилган фестивалдаги отишмада эса бир киши ҳалок бўлиб, етти киши яраланган эди.
Изоҳ (0)