Хитой АҚШ ҳукуматини Тайвандаги айирмачиларни қўллаб-қувватлашда айблади. Вашингтон учун бу жиддий оқибатларга олиб келиши мумкин, деди Хитой Халқ Республикаси ташқи ишлар вазири Чжао Лицзян. Унинг даъво қилишича, АҚШ «Хитойни манипуляция қилиш учун» Тайвандан фойдаланмоқда, деб ёзади «Коммерсантъ».
Хитойлик дипломат, хусусан, америкалик сенатор Темми Дакуортнинг Тайбейга ташрифини танқид қилди. У Тайванга 31 май куни кечқурун етиб келиб, орол маъмурияти раҳбари Сай Инвен билан учрашганди. Бунгача америкалик конгрессменларнинг Тайванга эълон қилинмаган ташрифи апрелда амалга оширилган.
Хитой ТИВ фикрича, АҚШ шу тариқа «Тайван мустақиллиги тарафдорларини зимдан рағбатлантиряпти ва қўллаб-қувватлаяпти». «Бу Тайван учун хавфли ва АҚШ учун жиддий оқибатларга олиб келиши мумкин», — деди Чжао. Унинг даъво қилишича, Тайван бўғозида кескинлик кучайишига орол раҳбариятининг АҚШ билан биргаликда «Хитойни манипуляция қилиш учун Тайвандан фойдаланиш»га уринишлари сабабчи бўлган.
Аввалроқ Хитой ТИВ АҚШдан Тайван билан барча расмий алоқаларни тўхтатишни талаб қилганди. АҚШ Давлат департаменти мамлакат «ягона Хитой» тамойилига содиқлигини ва Тайван мустақиллигини қўллаб-қувватламаслигини маълум қилди. 23 май куни эса Америка президенти Жо Байден агар Хитой Тайванга бостириб кирса, АҚШ «ҳарбий йўл билан аралашишга» тайёрлигини эълон қилди. Кейинроқ у Американинг Тайванга нисбатан позицияси ўзгаришсиз қолганини айтди.
Хитой Тайван ва АҚШ ўртасидаги «тил бириктириш»га жавобан Тайван яқинидаги ҳаво ва сув ҳудудида патруллик олиб борди.
Изоҳ (0)