Давлат раҳбарининг ҳамда ҳукумат қарорларига мувофиқ Инвестициялар ва ташқи савдо вазирлигининг бир қатор таркибий бўлинмалари раҳбарлари янги лавозимларга тайинланди. Бу ҳақда вазирлик матбуот хизмати хабар берди.
Хусусан, Инвестициялар ва ташқи савдо вазирлиги Ижтимоий соҳа ва фармацевтика саноати бошқармаси бошлиғи Улуғбек Эгамов Фармацевтика саноатини ривожлантириш агентлиги директорининг биринчи ўринбосари этиб тайинланди.
Енгил ва электр саноати бошқармаси бошлиғи Мирмуҳсин Султонов «Ўзтекстилсаноат» уюшмаси раисининг биринчи ўринбосари этиб тайинланди.
Мирмуҳсин Султонов тайинловга қадар Молия вазирлиги, Инвестициялар ва ташқи савдо вазирлиги бошқарма бошлиғи лавозимларида ишлаб келган.
Геология, тоғ-кон саноати, металлургия, машинасозлик ва қурилиш материаллари бошқармаси бошлиғи ўринбосари Бунёд Эгамбердиев Ўзбекистоннинг Индонезиядаги элчихонасининг савдо-иқтисодий ва туризм масалалари бўйича маслаҳатчиси этиб тайинланди.
Хитой билан ҳамкорлик қилиш бош бошқармаси бошлиғи Шоҳжаҳон Жумаев Ўзбекистон Ташқи иқтисодий фаолият миллий банки бошқаруви раисининг ўринбосари этиб тайинланди.
1 июнь куни бош вазир ўринбосари — инвестициялар ва ташқи савдо вазири Сардор Умурзоқов вазирлик жамоаси билан бўлиб ўтган учрашув чоғида юқоридаги раҳбарларнинг янги лавозимларга тайинланганлари билан самимий табриклаб, кейинги касбий фаолиятларида муваффақиятлар тилаган.
Аввалроқ Маданий мерос агентлиги директори лавозимидан озод қилингани, «Ўзбекконцерт»га янги директор тайинлангани, Тўлқин Абдусатторов адлия вазирининг ўринбосари лавозимига тайинлангани тўғрисида хабар берилганди.
Изоҳ (0)