Ўзбекистондаги 10 та ОТМ халқаро рейтингда reporter мақомига эга бўлди

Буюк Британиянинг нуфузли рейтинг ташкилоти – Times Higher Education Осиёдаги университетларни тадқиқот, таълим сифати каби мезонлар бўйича баҳоловчи Asia University Rankings-2022 халқаро рейтинги натижаларини эълон қилди.

Рейтингдан Ўзбекистондаги 10 та олий таълим муассасаси reporter сифатида ўрин олган:

• Ўзбекистон Миллий университети;
• Тошкент давлат юридик университети;
• Тошкент педиатрия тиббиёт институти;
• Тошкент шаҳридаги Турин политехника университети;
• Урганч давлат университети;
• Тошкент молия институти;
• «Тошкент ирригация ва қишлоқ хўжалиги механизациялаш муҳандислари институти» МТУ;
• Тошкент тиббиёт академияси;
• Тошкент давлат иқтисодиёт университети;
• Тошкент фармацевтика институти.

Ушбу рейтинг дунё бўйича ҳар йили Осиё давлатларидаги университетларни тадқиқот, таълим сифати, халқаро хилма-хиллик, иқтибослик ва саноат даромади (билимлар алмашиш) бўйича баҳолайди. Рўйхатдан ўрин эгаллаган 10 та олий таълим муассасаси The World University Rankings’нинг нуфузли рейтингларига кириш учун номзод сифатида тан олиниб, мазкур йўналишда рейтинг агентлиги уларга яқиндан ёрдам беради.

Маълумот учун, 2022 йил ушбу рейтингда 829 та университет қайд этилиб, улар орасида 625 та ўрин ва 200 дан ортиқ университетлар reporter, яъни даъвогар университетлар номинациясига эга бўлди.

Аввалроқ Ўзбекистондаги 30 та ОТМ The Impact Rankings 2022 халқаро рейтингига киритилгани тўғрисида хабар берилганди.

Эслатиб ўтамиз, 2019 йилнинг октябрида президент Шавкат Мирзиёев 2030 йилгача олий таълим тизимини ривожлантириш концепциясини тасдиқловчи қарорга имзо чеккан эди. Унга кўра, Ўзбекистон Миллий университети ва Самарқанд давлат университетини илғор университетларга айлантириш ва улардаги таълим даражасини дунёнинг 500 та энг яхши университетлари қаторига қўшиш режалаштирилган.